‘ती नवदुर्गा’ उपक्रमातून उपमहापौर शर्मिला बाबर यांचा महिलांना सन्मान, स्वावलंबन आणि स्त्रीशक्तीचा संदेश
पिंपरी, (महाराष्ट्र ब्रेकिंग न्यूज) : नवरात्रीमध्ये नवरंगांच्या साड्या परिधान करून उत्सव साजरा करण्याबरोबरच महिलांच्या आयुष्यातही नवनवीन रंग भरण्याचा प्रयत्न केला पाहिजे. एका स्त्रीने दुसऱ्या स्त्रीला कधीही कमी लेखू नये. तिच्या दिसण्यापेक्षा तिच्या मनावर प्रेम करावे, तिच्या चुका शोधण्यापेक्षा तिच्या संघर्षाला समजून घ्यावे आणि प्रत्येक महिलेला सन्मानाने वागवावे, असा महत्त्वपूर्ण संदेश पिंपरी-चिंचवडच्या उपमहापौर शर्मिला बाबर यांनी दिला.
महाराष्ट्र ब्रेकिंग न्यूजच्या ‘ती नवदुर्गा’ या विशेष उपक्रमातून त्यांनी महिलांच्या सामर्थ्याची, स्वाभिमानाची आणि परस्पर सहकार्याची जाणीव करून दिली. प्रत्येक स्त्री आपल्या चेहऱ्यावर हसू ठेवून जगत असते; मात्र त्या हसऱ्या चेहऱ्यामागे ती अनेकदा आपले दुःख, वेदना आणि संघर्ष लपवत असते. त्यामुळे महिलांनी एकमेकींच्या भावना समजून घेऊन त्यांना आधार देणे आवश्यक आहे, असे त्यांनी सांगितले.
महिलांमध्येच आहे दुर्गा, लक्ष्मी आणि सरस्वतीचे रूप!
महिलांनी स्वतःला कधीही कमजोर समजू नये. प्रत्येक स्त्रीमध्ये दुर्गेचे सामर्थ्य, लक्ष्मीची समृद्धी आणि सरस्वतीचे ज्ञान सामावलेले आहे. या शक्तीची जाणीव ठेवून महिलांनी अन्यायाविरुद्ध आवाज उठवावा, स्वतःच्या पायावर खंबीरपणे उभे राहावे आणि इतर महिलांनाही पुढे जाण्यासाठी मदत करावी, असे आवाहन शर्मिला बाबर यांनी केले.
महिलांचे सक्षमीकरण केवळ एका व्यक्तीपुरते मर्यादित नसून त्याचा परिणाम संपूर्ण कुटुंबावर आणि समाजावर होतो. एक सक्षम महिला आपल्या कुटुंबाला बळ देते, मुलांवर चांगले संस्कार करते आणि समाजाच्या प्रगतीत महत्त्वाची भूमिका बजावते. त्यामुळे महिलांना शिक्षण, स्वावलंबन, सन्मान आणि समान संधी मिळणे गरजेचे आहे.
स्त्रीशक्तीच्या एकजुटीतून सशक्त राष्ट्राची निर्मिती!
महिलांनी एकमेकींच्या यशाचा आनंद साजरा करावा, अडचणीच्या काळात एकमेकींच्या पाठीशी उभे राहावे आणि कोणत्याही महिलेचा आत्मविश्वास खचणार नाही, याची काळजी घ्यावी. महिलांमधील एकजूट, परस्पर आदर आणि सहकार्य यांतूनच सशक्त कुटुंब, सशक्त समाज आणि सशक्त राष्ट्राची निर्मिती होऊ शकते, असा विश्वास उपमहापौर शर्मिला बाबर यांनी व्यक्त केला.
नवरात्रीतील देवीपूजनाचा खरा अर्थ महिलांमधील शक्ती ओळखणे, त्यांच्या कर्तृत्वाचा सन्मान करणे आणि त्यांना पुढे जाण्यासाठी संधी उपलब्ध करून देणे हा आहे. प्रत्येक स्त्रीने स्वतः सक्षम व्हावे आणि दुसऱ्या स्त्रीलाही सक्षम बनवावे, हाच ‘ती नवदुर्गा’ उपक्रमातून शर्मिला बाबर यांनी दिलेला प्रेरणादायी संदेश आहे.
