मुख्यमंत्री देवेंद्र फडणवीस यांच्या हस्ते ह्युंडाईच्या पुणे प्लांटचे उद्घाटन; ११ हजार कोटींची गुंतवणूक करणार
तळेगावातील प्रकल्पाची वार्षिक उत्पादन क्षमता २०३० पर्यंत ३.२० लाख वाहनांपर्यंत वाढवणार; ४० लाख वाहनांच्या निर्यातीचा ऐतिहासिक टप्पा
तळेगाव , (महाराष्ट्र ब्रेकिंग न्यूज) : ह्युंडाई मोटर इंडिया लिमिटेडच्या (HMIL) तळेगाव, पुणे येथील अत्याधुनिक वाहन उत्पादन प्रकल्पाचे उद्घाटन महाराष्ट्राचे मुख्यमंत्री देवेंद्र फडणवीस यांच्या हस्ते १४ ऑक्टोबर २०२६ रोजी करण्यात आले. भारतातील ह्युंडाईच्या विस्ताराच्या प्रवासातील हा महत्त्वपूर्ण टप्पा मानला जात आहे. या प्रकल्पासाठी कंपनी टप्प्याटप्प्याने ११ हजार कोटी रुपयांपर्यंत गुंतवणूक करणार असून, सध्याची वार्षिक उत्पादन क्षमता १ लाख ७० हजार वाहनांवरून २०३० पर्यंत ३ लाख २० हजार वाहनांपर्यंत वाढवण्याचे उद्दिष्ट ठेवण्यात आले आहे.
या उद्घाटनप्रसंगी भारतातील कोरियाचे राजदूत ली सेओंग-हो, महाराष्ट्राच्या उपमुख्यमंत्री सुनेत्रा अजित पवार, ह्युंडाई मोटर ग्रुपचे कार्यकारी अध्यक्ष युसन चंग, उपाध्यक्ष जेहून चांग, ह्युंडाई मोटर कंपनीचे अध्यक्ष व मुख्य कार्यकारी अधिकारी होजे मुनोज आणि ह्युंडाई मोटर इंडिया लिमिटेडचे व्यवस्थापकीय संचालक व मुख्य कार्यकारी अधिकारी तरुण गर्ग यांच्यासह अन्य मान्यवर उपस्थित होते.
४० लाख वाहनांच्या निर्यातीचा ऐतिहासिक टप्पा
ह्युंडाई मोटर इंडिया लिमिटेडने भारतातून १९९९ पासून ४० लाख प्रवासी वाहनांच्या एकत्रित निर्यातीचा टप्पा गाठला आहे. तसेच भारतीय बाजारपेठेत कंपनीने जवळपास एक कोटी प्रवासी वाहनांची विक्री केली आहे. या कामगिरीमुळे भारतातील वाहन उत्पादन आणि जागतिक निर्यात क्षेत्रातील कंपनीची भूमिका अधोरेखित झाली आहे.
उद्घाटनप्रसंगी मुख्यमंत्री देवेंद्र फडणवीस यांनी ह्युंडाईच्या गुंतवणुकीचे आणि निर्यात क्षेत्रातील कामगिरीचे महत्त्व अधोरेखित केले. प्रगत उत्पादन तंत्रज्ञान, नाविन्यता, स्थानिकीकरण आणि कौशल्य विकासातील गुंतवणूक महाराष्ट्रातील आर्थिक विकास, रोजगारनिर्मिती आणि वाहन उद्योगाच्या परिसंस्थेला चालना देईल, असे त्यांनी सांगितले. कंपनीच्या भविष्यातील विस्ताराला महाराष्ट्र सरकारकडून पाठबळ देण्यात येईल, अशी भूमिकाही त्यांनी व्यक्त केली.
एआय आणि इंडस्ट्री ४.० तंत्रज्ञानाने सुसज्ज प्रकल्प
तळेगावातील हा उत्पादन प्रकल्प इंडस्ट्री ४.० तत्त्वांवर आधारित असून, त्यामध्ये कृत्रिम बुद्धिमत्ता (एआय), डिजिटल उत्पादन प्रणाली आणि प्रगत गुणवत्ता व्यवस्थापन तंत्रज्ञानाचा वापर केला जाणार आहे. एआय-आधारित गुणवत्ता तपासणी, उत्पादन प्रक्रियेचे विश्लेषण, दोष शोधण्याची यंत्रणा आणि प्रेडिक्टिव्ह मेंटेनन्स यांसारख्या सुविधा या प्रकल्पाची वैशिष्ट्ये आहेत.
कर्मचाऱ्यांच्या प्रशिक्षणासाठी ऑगमेंटेड रिअॅलिटी (एआर) तंत्रज्ञानाचा वापर, आधुनिक प्रशिक्षण केंद्रे, वैद्यकीय सुविधा आणि कर्मचारी कल्याणासाठी आवश्यक पायाभूत सुविधांवरही भर देण्यात आला आहे. भविष्यातील अंतर्गत ज्वलन इंजिन (ICE) आणि हायब्रिड वाहनांच्या विविध मॉडेल्सच्या उत्पादनासाठी अनुकूल अशा लवचिक उत्पादन यंत्रणा येथे विकसित करण्यात आल्या आहेत.
‘ऑल न्यू ह्युंडाई व्हेन्यू’चे उत्पादन पुण्यात
कंपनीच्या माहितीनुसार, ‘ऑल न्यू ह्युंडाई व्हेन्यू’चे उत्पादन पुणे प्लांटमध्ये केले जात असून, या वाहनांची जागतिक बाजारपेठांमध्ये निर्यात केली जाते. आगामी काळात ३५ हून अधिक देशांमध्ये निर्यात वाढवण्याची कंपनीची योजना आहे.
या प्रकल्पात वाहन उत्पादनाला पूरक ठरणारे अत्याधुनिक इंजिन शॉपही आहे. त्याची वार्षिक उत्पादन क्षमता दीड लाख इंजिन्स इतकी आहे. पुणे आणि चेन्नई येथील उत्पादन केंद्रांच्या एकत्रित क्षमतेत वाढ करून २०३० पर्यंत वार्षिक जवळपास ११.४ लाख वाहनांच्या उत्पादन क्षमतेपर्यंत पोहोचण्याचे कंपनीचे नियोजन आहे.
पुरवठादारांच्या गुंतवणुकीतून रोजगारनिर्मितीला चालना
पुणे प्लांटच्या विकासासोबतच स्थानिक पुरवठादारांचे जाळे मजबूत करण्यावरही कंपनीने भर दिला आहे. कंपनीच्या माहितीनुसार, पुणे परिसरातील ५५ पुरवठादार भागीदारांनी महाराष्ट्रात जवळपास ४,६०० कोटी रुपयांची गुंतवणूक केली आहे. प्रथम आणि द्वितीय श्रेणीतील पुरवठादारांच्या परिसंस्थेमुळे राज्यात १८ हजारांहून अधिक रोजगाराच्या संधी निर्माण झाल्या आहेत.
प्लांटच्या ५० किलोमीटरच्या परिसरात पुरवठादारांचे मोठे जाळे असल्याने स्थानिक उत्पादन, पुरवठा साखळी आणि प्रादेशिक औद्योगिक विकासाला बळ मिळण्याची अपेक्षा आहे.
संशोधन, इलेक्ट्रिफिकेशन आणि सामाजिक उपक्रमांवरही भर
उत्पादनवाढीसोबतच संशोधन, इलेक्ट्रिफिकेशन आणि भविष्यातील मोबिलिटी तंत्रज्ञानासाठी गुंतवणूक करण्याची कंपनीची योजना आहे. भारतातील सात अग्रगण्य संस्थांशी उद्योग-शैक्षणिक सहकार्याचे जाळे उभारण्यात आले असून, बॅटरी तंत्रज्ञान, इलेक्ट्रिफिकेशन आणि भविष्यातील वाहन तंत्रज्ञानाशी संबंधित सुमारे ४० संशोधन प्रकल्प सुरू असल्याचे कंपनीने नमूद केले आहे.
ह्युंडाई मोटर इंडिया फाउंडेशनच्या माध्यमातून महाराष्ट्रात पर्यावरण संवर्धन, आरोग्यसेवा, पाणीपुरवठा आणि कौशल्य विकास क्षेत्रातही उपक्रम राबवले जात आहेत. ‘आयोनिक फॉरेस्ट’अंतर्गत १० लाखांहून अधिक झाडांची लागवड, ‘स्पर्श संजीवनी’च्या माध्यमातून ५० हजारांहून अधिक ग्रामीण रहिवाशांना लाभ, ‘होप४कॅन्सर’अंतर्गत दोन हजारांहून अधिक व्यक्तींसाठी तपासणी सुविधा आणि ‘प्रोजेक्ट एच₂ओपीई’च्या माध्यमातून १ लाख २० हजारांहून अधिक विद्यार्थ्यांना शुद्ध पिण्याच्या पाण्याची सुविधा उपलब्ध करून दिल्याची माहिती कंपनीने दिली आहे.
भारताच्या औद्योगिक विकासातील नवा अध्याय
ह्युंडाई मोटर इंडिया लिमिटेड भारतातील ३० वर्षांचा प्रवास साजरा करत असताना पुणे प्लांटच्या उद्घाटनामुळे कंपनीच्या उत्पादन, निर्यात आणि तंत्रज्ञान विकासाच्या धोरणाला नवी दिशा मिळणार आहे. ११ हजार कोटी रुपयांची प्रस्तावित गुंतवणूक, उत्पादन क्षमतेचा विस्तार, स्थानिक पुरवठादारांना मिळणाऱ्या संधी आणि रोजगारनिर्मिती यांमुळे तळेगाव परिसरातील वाहन उद्योगाच्या विकासाला चालना मिळण्याची अपेक्षा आहे.
