शहर सरचिटणीस सजी वर्की आणि युवकचे प्रदेश सचिव चंद्रशेखर जाधव यांनी केले आयोजन
पिंपरी, (महाराष्ट्र ब्रेकिंग न्यूज) – मुख्यमंत्री लाडकी बहीण योजना राज्य सरकारकडून सुरू करण्यात आली आहे. यामध्ये महिलांना दर महिन्याला १५०० रूपये मिळणार आहेत. याच पार्श्भूमीवर काळेवाडी प्रभागात पिंपरी चिंचवड शहर काँग्रेसचे सरचिटणीस सजी वर्की आणि महाराष्ट्र प्रदेश युवक काँग्रेसचे सचिव चंद्रशेखर जाधव यांच्या वतीने नोंदणी फॉर्म निशुल्क भरण्याचे त्याचबरोबर नव मतदारांची मतदार नोंदणी करण्याच्या अभियानाचा शुभारंभ आज (गुरुवारी) करण्यात आला आहे.
१८ जुलै ते २१ जुलै या दरम्यान चार दिवस हे अभियान काळेवाडी, विजयनगर येथील संत निरंकारी भवन शेजारी असलेल्या सजी वर्की यांच्या जनसंपर्क कार्यालय याठिकाणी घेण्यात आले आहे. पिंपरी चिंचवड शहर काँग्रेस कमिटीचे अध्यक्ष कैलास कदम यांच्या हस्ते या अभियानाचा शुभारंभ झाला.
याप्रसंगी वरिष्ठ उपाध्यक्ष मयुर जयस्वाल, प्रदेश सामाजिक न्याय विभाग उपाध्यक्ष चंद्रकांत लोंढे, शहाबुद्दीन शेख, युवराज दाखले, चिंचवड ब्लॉक अध्यक्ष ज्ञानेश्वर मलशेट्टी, प्रदेश युवक काँग्रेस प्रवक्ते गौरव चौधरी, प्रदेश सोशल मिडिया समन्वयक वसिम शेख, पिंपरी विधानसभा अध्यक्ष प्रतिक जगताप, भोसरी विधानसभा अध्यक्ष जमीर शेख, जिल्हा युवक काँग्रेसचे सरचिटणीस जिफिन जॉन्सन, विक्रांत सानप यांच्यासह विविध पदाधिकारी, कार्यकर्ते आणि प्रभागातील महिला व युवक मोठ्या संख्येने उपस्थित होते.
मुख्यमंत्री लाडकी बहीण योजना ही राज्यातील सर्वसामान्य महिला भगिनींची हक्काची योजना आहे. त्यामुळे महिलांनी न संकोचता या योजना लाभ घ्यावा. त्यासाठी या अभियानाच्या माध्यमातून आम्ही महिलांना निःशुल्क फॉर्म भरण्यासाठी मदत करणार आहोत. त्याचबरोबर भव्य मतदार नोंदणी अभियानाच्या माध्यमातून १८ वर्ष पूर्ण झालेल्या व अद्याप मतदार नोंदणी न केलेल्या युवकांना नव्याने मतदार यादीत नाव नोंदविण्यासाठी सहकार्य करण्यात येणार आहे. त्यामुळे काळेवाडी प्रभागातील जास्तीत जास्त महिलांनी योजनेचा व युवकांनी या अभियानाचा लाभ घ्यावा, असे आवाहन आयोजक सजी वर्की आणि चंद्रशेखर जाधव यांनी केले आहे.
