व्यवसायासाठी कर्जाच्या व्यवहारातून ३ कोटी २२ लाखांचा गंडा
जेएफएस कंपनी व दिलीप यादव यांच्यावर गुन्हा दाखल करण्याची मागणी; काळेवाडी पोलिसांकडे तिघांची तक्रार
पिंपरी, (महाराष्ट्र ब्रेकिंग न्यूज) – व्यवसायासाठी आर्थिक मदत व कर्ज मिळवून देण्याचे आमिष दाखवत तब्बल ३ कोटी २२ लाख रुपयांची रक्कम घेऊन विश्वासघात व आर्थिक फसवणूक केल्याचा गंभीर आरोप करण्यात आला आहे. या प्रकरणी जयवंत बाबुराव नढे, विनोद जयवंत नढे आणि किरण जयवंत नढे यांनी काळेवाडी पोलिसांकडे तक्रार अर्ज दाखल केला असून, जेएफएस कंपनी आणि दिलीप यादव यांच्याविरुद्ध गुन्हा दाखल करून सखोल चौकशी करावी तसेच आपली रक्कम परत मिळवून द्यावी, अशी मागणी केली आहे.
तक्रारीनुसार, संबंधित व्यक्तींनी व्यवसायासाठी आर्थिक मदत व कर्जाची आवश्यकता असल्याचे सांगून तक्रारदारांचा विश्वास संपादन केला. त्यानंतर कर्ज करार (Loan Agreement) तसेच अन्य आर्थिक व्यवहारांच्या माध्यमातून विविध तारखांना तक्रारदारांकडून मोठ्या प्रमाणात रक्कम घेण्यात आल्याचा दावा तक्रारीत करण्यात आला आहे.
आरटीजीएसद्वारे कोट्यवधींची रक्कम वर्ग
तक्रारदारांनी दिलेल्या माहितीनुसार, विविध बँक खात्यांमध्ये आरटीजीएसच्या माध्यमातून मोठ्या रकमा हस्तांतरित करण्यात आल्या. याशिवाय काही रक्कम रोख स्वरूपात दिल्याचाही दावा करण्यात आला आहे. या व्यवहारांच्या समर्थनार्थ बँक स्टेटमेंट, आरटीजीएस नोंदी, कर्ज करार तसेच अन्य संबंधित कागदपत्रे पोलिसांकडे सादर केल्याचे तक्रारीत नमूद आहे.
मुदत संपली; मात्र रक्कम परत नाही
संबंधित व्यवहार करताना ठराविक मुदतीत रक्कम परत करण्याचे आश्वासन देण्यात आले होते, असा तक्रारदारांचा आरोप आहे. मात्र ठरलेली मुदत उलटून गेल्यानंतरही रक्कम परत करण्यात आली नसल्याचे तक्रारीत म्हटले आहे. वारंवार पाठपुरावा करूनही समाधानकारक प्रतिसाद मिळत नसल्याने अखेर तक्रारदारांनी पोलिसांकडे धाव घेतल्याचे सांगण्यात आले आहे.
आर्थिक व्यवहारांची चौकशी करण्याची मागणी
या प्रकरणातील ३ कोटी २२ लाख रुपयांच्या कथित व्यवहाराचा संपूर्ण तपास करण्यात यावा, संबंधित बँक खात्यांमधील आर्थिक देवाणघेवाण तपासावी, आरटीजीएस व्यवहारांची पडताळणी करावी, कर्ज करार व अन्य कागदपत्रांची सत्यता तपासावी आणि या व्यवहारात संबंधित व्यक्तींची नेमकी भूमिका काय होती, याचा शोध घ्यावा, अशी मागणी तक्रारदारांनी केली आहे.
तसेच जेएफएस कंपनी व दिलीप यादव यांच्यावर फसवणूक, विश्वासघात व आर्थिक गैरव्यवहारासंदर्भात योग्य ती कायदेशीर कारवाई करून गुन्हा दाखल करावा, अशी मागणीही करण्यात आली आहे.
या तक्रारीमुळे परिसरात मोठ्या आर्थिक व्यवहाराबाबत चर्चा सुरू झाली असून, पोलिसांच्या चौकडीकडे या प्रकरणाचे लक्ष लागले आहे. दरम्यान, तक्रारीतील आरोपांची सत्यता अद्याप तपासातून स्पष्ट झालेली नसून, पोलिस तपासानंतरच या संपूर्ण प्रकरणातील वस्तुस्थिती समोर येणार आहे.
