मोबाईल नेटवर्कपासून शवागाराच्या सुविधांपर्यंत प्रश्नांचा घेतला आढावा; तातडीने कार्यवाहीची मागणी
पुणे, (महाराष्ट्र ब्रेकिंग न्यूज) – रुग्णालयात उपचारासाठी आलेल्या रुग्णांना आणि त्यांच्या नातेवाईकांना मोबाईल नेटवर्कसारख्या मूलभूत सुविधेसाठीही संघर्ष करावा लागत असेल, तर ही अत्यंत गंभीर बाब आहे. रुग्णांच्या हक्कांसाठी आणि आरोग्य व्यवस्थेतील त्रुटींविरोधात आता रिपब्लिकन पार्टी ऑफ इंडिया (आठवले) युवक आघाडीने आक्रमक भूमिका घेतली आहे.
रिपब्लिकन पार्टी ऑफ इंडिया (आठवले) युवक आघाडीचे पिंपरी-चिंचवड शहराध्यक्ष डॉ. धम्मरत्न गायकवाड यांनी आज पुणे जिल्हा रुग्णालयाचे जिल्हा वैद्यकीय अधिकारी तथा सिव्हिल सर्जन अंबादास देवमाने यांची प्रत्यक्ष भेट घेऊन रुग्णालयातील विविध गंभीर प्रश्नांवर सविस्तर चर्चा केली.
रुग्णालयात नेटवर्क नाही; मग आपत्कालीन परिस्थितीत संपर्क कसा साधायचा?
पुणे जिल्हा रुग्णालयाच्या परिसरात मोबाईल नेटवर्कची मोठी समस्या असून यामुळे रुग्णांचे नातेवाईक, डॉक्टर, परिचारिका तसेच रुग्णालयातील इतर कर्मचारी यांना एकमेकांशी संपर्क साधताना अडचणी येत आहेत.
विशेषतः गावाकडून उपचारासाठी आलेल्या रुग्णांच्या नातेवाईकांना बाहेरच्या व्यक्तींशी संपर्क साधता येत नसल्याने मोठी गैरसोय होत आहे. आपत्कालीन परिस्थितीत डॉक्टरांशी अथवा नातेवाईकांशी तातडीने संपर्क होणे अत्यावश्यक असताना रुग्णालयासारख्या महत्त्वाच्या ठिकाणी नेटवर्कची ही समस्या दुर्लक्षित करता येणार नाही.
त्यामुळे रुग्णालय परिसरात तातडीने मोबाईल सिग्नल बूस्टर बसविण्यात यावा, अशी ठोस मागणी असलेले निवेदन डॉ. गायकवाड यांच्या वतीने जिल्हा शल्यचिकित्सकांना देण्यात आले.
शवागाराची क्षमता वाढविण्याची मागणी
यासोबतच रुग्णालयातील कोल्ड स्टोरेज व शवागार (Mortuary) सुविधेची क्षमता वाढविणे, आवश्यक पायाभूत सुविधा उपलब्ध करून देणे आणि रुग्णालयाशी संबंधित इतर प्रलंबित प्रश्नांवरही यावेळी चर्चा करण्यात आली.
“रुग्णालयात येणारा प्रत्येक नागरिक हा केवळ रुग्ण नसून तो आपल्या व्यवस्थेची जबाबदारी आहे. त्याला योग्य सुविधा मिळणे हा उपकार नसून त्याचा अधिकार आहे,” अशी ठाम भूमिका डॉ. धम्मरत्न गायकवाड यांनी मांडली.
या सर्व प्रश्नांची गांभीर्याने दखल घेत जिल्हा शल्यचिकित्सक अंबादास देवमाने यांनी संबंधित प्रश्नांवर लवकरात लवकर कार्यवाही करून आवश्यक कामे पूर्ण करण्याचे आश्वासन दिले.
RPI (आठवले) युवक आघाडीचा इशारा!
रुग्णालयातील प्रश्नांवर प्रशासनाने तातडीने आणि ठोस कार्यवाही करावी, अशी मागणी युवक आघाडीच्या वतीने करण्यात आली आहे. केवळ आश्वासनावर न थांबता प्रत्यक्ष काम पूर्ण होईपर्यंत या प्रश्नांचा सातत्याने पाठपुरावा करण्यात येईल, असा निर्धार डॉ. धम्मरत्न गायकवाड यांनी व्यक्त केला.
या वेळी युवक आघाडीचे कार्याध्यक्ष भरत खरात, संपर्क प्रमुख निखिल केळगणे, सार्थक कवडे आदी पदाधिकारी उपस्थित होते.
“रुग्णांच्या प्रश्नांवर मौन नाही; प्रश्न सुटेपर्यंत संघर्ष सुरूच!”
