चिंचवड, (महाराष्ट्र ब्रेकिंग न्यूज) – दुर्बल, गरजू, पीडित व वंचित विद्यार्थ्यांच्या शिक्षणाला आर्थिक पाठबळ देण्याच्या उद्देशाने वुई टुगेदर फाउंडेशनच्या वतीने आर्थिक सहाय्यता निधी वाटप व दहावी-बारावी गुणवंत विद्यार्थ्यांच्या सत्काराचा दुहेरी कार्यक्रम चिंचवड येथे उत्साहात पार पडला.
या कार्यक्रमाला पिंपरी चिंचवड महानगरपालिकेचे महापौर रवि लांडगे प्रमुख पाहुणे म्हणून उपस्थित होते. तसेच राष्ट्रपती पुरस्कार प्राप्त प्राध्यापिका शिल्पा गौरी गणपुले यांनी प्रमुख वक्त्या म्हणून विद्यार्थ्यांना मार्गदर्शन केले.
वुई टुगेदर फाउंडेशनच्या वतीने दरवर्षी पिंपरी चिंचवड शहरातील गरजू विद्यार्थ्यांची निवड करून त्यांना शैक्षणिक आर्थिक मदत केली जाते. तसेच दहावी व बारावी परीक्षेत यश संपादन करणाऱ्या गुणवंत विद्यार्थ्यांचा गौरव करण्यात येतो.
कार्यक्रमाच्या प्रास्ताविकात फाउंडेशनचे अध्यक्ष मधुकर बच्चे यांनी संस्थेच्या आजपर्यंतच्या सामाजिक कार्याची माहिती दिली तसेच भविष्यातील उपक्रमांची रूपरेषा मांडली.
महापौर रवि लांडगे यांनी विद्यार्थ्यांना मार्गदर्शन करताना वुई टुगेदर फाउंडेशनच्या कार्याचे कौतुक केले. गरजू विद्यार्थ्यांसाठी संस्था करीत असलेले कार्य अत्यंत प्रेरणादायी असून असे सामाजिक उपक्रम सातत्याने सुरू ठेवावेत, अशा शुभेच्छा त्यांनी दिल्या.
प्रा. शिल्पा गौरी गणपुले यांनी विद्यार्थ्यांना शिक्षणाची दिशा, अभ्यासाची योग्य पद्धत आणि भविष्यातील संधी याबाबत प्रभावी मार्गदर्शन केले.
यावेळी अनेक पालक व विद्यार्थ्यांनी फाउंडेशनचे आभार मानताना भावनिक भावना व्यक्त केल्या. शिक्षणाचा आर्थिक भार कमी करण्यासाठी संस्थेने दिलेली मदत आयुष्यभर लक्षात राहील, अशा भावना पालकांनी व्यक्त केल्या.
या कार्यक्रमाच्या यशस्वी आयोजनासाठी फाउंडेशनचे अध्यक्ष मधुकर बच्चे, उपाध्यक्ष रवींद्र काळे, सचिव जयंत कुलकर्णी, सहसचिव मंगला डोळे-सपकाळे, खजिनदार दिलीप चक्रे तसेच सर्व पदाधिकारी व सदस्यांनी विशेष परिश्रम घेतले.
कार्यक्रमाचे सूत्रसंचालन मंगला डोळे-सपकाळे यांनी केले तर उपाध्यक्ष रवींद्र काळे यांनी उपस्थितांचे आभार मानले.
