“पर्यावरण दिनी ‘एक झाड एक आशा’ उपक्रम: आमदार अमित गोरखे यांचा विद्यार्थ्यांसह हिरवा संकल्प”

चिंचवड, (महाराष्ट्र ब्रेकिंग न्यूज) –  जागतिक पर्यावरण दिनाच्या निमित्ताने आमदार  अमित गोरखे यांच्या पुढाकाराने आज स्थानिक शाळेतील विद्यार्थ्यांसोबत पर्यावरण जनजागृती आणि वृक्षारोपण उपक्रमाचे आयोजन करण्यात आले.
‘मुले हे भारताचे भविष्य आहेत आणि पर्यावरण हे भविष्य सुरक्षित ठेवणारे साधन आहे’ या संकल्पनेवर आधारित हा कार्यक्रम अत्यंत प्रेरणादायी ठरला.

कार्यक्रमात आमदार गोरखे यांनी विद्यार्थ्यांशी संवाद साधताना सांगितले, “मुले हे भविष्य आहेत आणि भविष्यातील जग किती सुंदर आणि सुरक्षित असेल, हे त्यांच्या हातातील कृतीवर अवलंबून आहे.
म्हणूनच आपण त्यांच्यामध्ये पर्यावरणाबाबतची जाणीव रुजवली पाहिजे.””झाड लावणे म्हणजे उद्याच्या उज्ज्वल भविष्याची पायाभरणी करणे होय.यावेळी पंतप्रधान नरेंद्र मोदी यांच्या ‘एक पेड माँ के नाम’या अभियानाचा संदर्भ देत, गोरखे यांनी विद्यार्थ्यांना त्यांच्या आईच्या सन्मानार्थ एक तरी झाड लावण्याचे आणि त्याचे संगोपन करण्याचे आवाहन केले.

या अभिनव उपक्रमामुळे विद्यार्थ्यांमध्ये एक भावनिक नाते तयार झाले आणि पर्यावरण संवर्धनाच्या दृष्टीने एक सकारात्मक पाऊल उचलले गेले. कार्यक्रमादरम्यान शाळेच्या परिसरात विविध प्रकारची फळझाडे, औषधी वनस्पती व छायादायक झाडांची लागवड करण्यात आली.
तसेच पर्यावरण संवर्धनावर आधारित वक्तृत्व, चित्रकला आणि घोषवाक्य स्पर्धांचेही आयोजन करण्यात आले, ज्यात विद्यार्थ्यांचा उत्स्फूर्त सहभाग लाभला.

या उपक्रमाच्या माध्यमातून पिंपरी- चिंचवड परिसरात पर्यावरणाबद्दल सकारात्मक विचार रुजवण्यास मदत झाली आहे.यापुढील काळातही असेच उपक्रम राबवून पर्यावरण संवर्धनासाठी लोकांमध्ये जनजागृती निर्माण करण्याचा निर्धार आमदार गोरखे यांनी व्यक्त केला.

या कार्यक्रमास समीर जेऊरकर,  मृदुला गायकवाड,नॉवेल स्कूलच्या मुख्याध्यापिका, माजी नगरसेवक सिद्धेश्वर बारणे, तसेच शालेय शिक्षक, पदाधिकारी आणि पालक मोठ्या संख्येने उपस्थित होते.
मृदुला गायकवाड यांनी विद्यार्थ्यांमध्ये पर्यावरणप्रेम जागवण्यासाठी घेतल्या जाणाऱ्या उपक्रमांविषयी माहिती दिली, तर समीर जेऊरकर यांनी शाळेच्या माध्यमातून भविष्यात अधिक व्यापक हरित प्रकल्प राबवण्याचा संकल्प व्यक्त केला.
मुख्याध्यापक आणि मा. नगरसेवक सिद्धेश्वर बारणे यांनी विद्यार्थ्यांचा उत्साह पाहून समाधान व्यक्त केले आणि असे उपक्रम सातत्याने राबवण्याची गरज अधोरेखित केले.