पिंपरी, (महाराष्ट्र ब्रेकिंग न्यूज)- पुणे महानगर प्रदेश विकास प्राधिकरणातर्फे ३५ भूखंड यांचे ऑनलाईन ई-लिलाव पद्धतीने ८० वर्षांच्या भाडेपट्टा तत्त्वावर वाटप करण्यात येणार आहे. यात हवेली, खेड, मावळ व मुळशी या तालुक्यातील विविध गावांतील ३२ सुविधा भूखंड, २ आरक्षित शैक्षणिक भूखंड आणि १ सार्वजनिक सुविधा (लायब्ररी / संगीत विद्यालय) भूखंड यांचे ऑनलाईन ई-लिलाव करण्यात येणार आहे. यासाठी विहीत पात्रता धारणा करणाऱ्या इच्छुक व्यक्ती / संस्था यांचेकडून अर्ज मागविण्यात येत आहे.
या भूखंडांचे वाटप ई-लिलावाद्वारे होणार असून नोंदणी व निविदा दस्ताऐवज डाऊनलोड हे २१/०७/२०२५ रोजी सायं. ५.०० वा. पासून ते ११/०८/२०२५ रोजी सायं. ५.०० वा. पर्यंत https://eauction.gov.in या संकेतस्थळावर करावयाचे आहेत. तांत्रिक दृष्ट्या पात्र बोलीदारांची घोषणा २१/०८/२०२५ रोजी करण्यात येणार असून २२/०८/२०२५ रोजी सकाळी ११.०० वाजता संकेतस्थळावर ई-लिलाव प्रक्रिया सुरु होईल. या ई-लिलाव प्रक्रियेसंबंधी सूचना सविस्तर अटी व शर्तीचे माहितीपुस्तक https://eauction.gov.in व www.pmrda.gov.in या संकेतस्थळावर पाहण्यास उपलब्ध आहे. इच्छुक व्यक्ती / संस्था यांनी ई-लिलाव प्रक्रियेत सहभाग घ्यावा, असे आवाहन पीएमआरडीएचे महानगर आयुक्त डॉ. योगेश म्हसे यांनी केले आहे.
