चिंचवड विधानसभेसाठी शंकर जगताप, भाऊसाहेब भोईर, नाना काटे यांची दावेदारी मजबूत! चिंचवडमध्ये महायुतीचे पक्षच समोरासमोर येण्याची शक्यता!

पिंपरी, (महाराष्ट्र ब्रेकिंग न्यूज) – लोकसभा निवडणुकीनंतर राज्यात आता विधानसभेचे वारे वाहू लागले आहे. या निवडणुकीस काही महिने बाकी असतानाच राज्यातील महायुती आणि महाविकास आघाडीत वादळाची स्थिती निर्माण झाली आहे.

विधानसभा निवडणुक ही अवघ्या काही महिन्यांवर आली आहे. महायुती आणि महाविकास आघाडीमध्ये वेगवेगळ्या मतदार संघावर रस्सीखेच सुरू असल्याचं बघायला मिळत आहे. विधानसभा निवडणुकीचे बिगुल काही महिन्यात वाजणार आहे. त्या अगोदरच आमदारकीसाठी भाजपचे अनेक जण रिगणात आहे. चिंचवडमध्ये भाजपचे वर्चस्व मानणारा वर्ग आहे. चिंचवड विधानसभा सभेसाठी शंकर जगताप यांनी दावेदारी मागितली आहे. शंकर जगताप यांनी मागील काही महिन्यांपूर्वी धार्मिक कार्यक्रमाच्या माध्यमातून मतदारांशी जोडले गेले. तसेच श्रीरंग बारणे यांच्या विजयासाठी चिंचवड मधून पावणेदोन लाखाच लीड घेत शंकर जगताप हे विजयाचे किंगमेकर ठरले. लोकसभेची निवडणूक ही विधानसभेची ट्रायल होती असे म्हणणे वावगे ठरेल.शहरातील मोजकेच नेते आपल्या प्रभागापुरते मर्यादित आहे. आणि काहीं आमदारकीचे स्वप्ने पाहत असल्याचे चित्र आहे. शहराच्या प्रबळ दावेदरात शंकर जगताप, भाऊसाहेब भोईर, नाना काटे असून दुसरे कोणी ही या आमदारकीच्या रेसमध्ये दिसून येत नाही.

भाजपचे दिवंगत नेते लक्ष्मण जगतापांच्या निधनानंतर झालेल्या पोटनिवडणुकीत त्यांच्या पत्नी अश्विनी जगताप यांना उमेदवारी जाहीर झाली आणि त्या निवडूनही आल्या.यामध्ये भाजपचे शहराध्यक्ष शंकर जगताप यांचे नेतृत्व सिद्ध झाले. भाजप पिंपरी चिंचवड शहराध्यक्षपदाची धुरा सध्या शंकर पांडुरंग जगताप यांच्या खांद्यावर आहे.त्यांनी भाजपचे चिंचवड विधानसभा निवडणूक प्रमुख म्हणून काम पाहिले आहे.आगामी महापालिका निवडणुकांच्या पार्श्वभूमीवर भारतीय जनता पार्टीच्या शहर नेतृत्वाची धुरा शंकर जगताप यांच्याकडे सोपवण्यात आली होती.पण महापालिका निवडणुका झाल्याच नाहीत.

पिंपरी- चिंचवड आणि भोसरी विधानसभा मतदारसंघांवर राष्ट्रवादी अजित पवार गटाने दावा केला आहे. चिंचवड आणि भोसरी विधानसभा मतदारसंघात भाजपचे आमदार आहेत. त्यामुळे या दोन जागांवरून महायुतीत रस्सीखेच होण्याची शक्यता आहे.

जेष्ठ नेते भाऊसाहेब भोईर यांनी मराठी नाट्य संमेलन घेऊन विधानसभा निवडणूकीची रंगीत तालीम असल्याचे पाहायला मिळाले.नाना काटे यांनी मागील चिंचवडच्या  पोटनिवडणुकीत तिरंगी लढतीमुळे विजयाच्या जवळ असताना नाना काटे यांचा पराभव झाला. तरीही, पराभवाने न खचता नाना काटे पुन्हा नव्या जोमाने कामाला लागले आहेत. पक्ष संघटना बळकट करताना विशेषतः युवक वर्गाची संघटनात्मक बांधणी मजबूत केली. तसेच चिंचवड विधानसभा मतदारसंघातील विकास कामे, नागरिकांच्या समस्या, नागरिकांच्या सुखदुःखाच्या समयी गाठीभेटी, तरुणाईचे प्रश्न सोडवणे, विविध कार्यक्रमांना हजेरी, २४ बाय ७ उपलब्ध राहत आपला दैनंदिन कार्यक्रम सुरूच ठेवला आहे.

शंकर जगताप यांनी  चिंचवड विधानसभा मतदारसंघातील पोटनिवडणुकीत आपल्या नेतृत्वाची चुणूक दाखवली होती. ते पोटनिवडणुकीतील भाजपच्या विजयाचे शिल्पकार ठरले होते.लक्ष्मण जगताप यांच्या निधनानंतर चिंचवड मतदारसंघात भाजपमध्ये पोकळी निर्माण झाली. शंकर जगताप यांनी न डगमगता नेतृत्व करण्याची तयारी दाखविली. मात्र, ऐनवेळी शंकर यांच्याऐवजी वहिनी अश्विनी जगताप यांना उमेदवारी देण्याचे पक्षश्रेष्ठींनी निर्णय दिला. परंतु, कोणतीही नाराजी व्यक्त न करता त्यांनी संपूर्ण निवडणूक एकहाती घेऊन पडद्यामागील सूत्रे हलविली.

दिवंगत लक्ष्मण जगताप यांच्यानंतर चिंचवडचा गड जगताप कुटुंबीय राखू शकणार नाही, अशी शंका भाजप व विरोधी पक्षांतील पदाधिकाऱ्यांना होती. मात्र, शंकर जगताप यांनी बंधूच्या दु:खातून स्वत:ला व कुटुंबाला तर सावरले. पण भाजपचे नेते, पदाधिकारी व कार्यकर्त्यांशी योग्य समन्वय ठेवून चुरशीच्या निवडणुकीतही विजयश्री खेचून आणला.

शहरातील काही इच्छुक उमेदवारांनी कार्यकर्त्यांची पेरणी केलेली नाही, लोकांपर्यंत पोहोचणे तर दूरच राहिले असे नेते आता आमदारकीची स्वप्ने बघत आहे.

चिंचवड विधानसभा मतदारसंघावर भाजपच्या विद्यमान आमदार अश्विनी लक्ष्मण जगताप आहेत. मात्र महायुतीत राष्ट्रवादी काँग्रेस अजित पवार गटानेही चिंचवडवर दावा केला आहे. त्यानंतर भाजपचे शहराध्यक्ष शंकर जगतापानांही आपण आता विधानसभेचे प्रबळ दावेदार असल्याचे दाखवून दिले आहे. यावर भाजप कसा तोडगा काढणार, की चिंडवडमध्येही वेगळा राजकीय प्रयोग होणार, हेच आगामी काळात पाहणे औत्सुक्याचे ठरणार आहे.