पिंपरी, (महाराष्ट्र ब्रेकिंग न्यूज) – चॅलेंजर पब्लिक स्कूल येथे गुरुपौर्णिमा उत्साहपूर्ण आणि भक्तिमय वातावरणात साजरी करण्यात आली. या विशेष कार्यक्रमात विद्यार्थ्यांनी आपल्या गुरुजनांप्रती आदर, कृतज्ञता आणि प्रेम व्यक्त केले.
कार्यक्रमाची सुरुवात दीपप्रज्वलन व सरस्वती पूजनाने झाली. विद्यार्थ्यांनी गुरूंच्या महत्त्वावर आधारित भाषणे, श्लोक, गीत आणि सांस्कृतिक कार्यक्रम सादर करून उपस्थितांची मने जिंकली. विद्यार्थ्यांनी शिक्षकांना शुभेच्छापत्रे व पुष्पगुच्छ अर्पण करून त्यांच्याविषयीचा आदर व्यक्त केला.
शाळेच्या मुख्याध्यापिका सौ. ज्योतिका मल्कानी यांनी विद्यार्थ्यांना गुरु-शिष्य परंपरेचे महत्त्व सांगत, “गुरू हे विद्यार्थ्यांच्या जीवनाला योग्य दिशा देणारे दीपस्तंभ असतात. त्यांच्या मार्गदर्शनामुळेच विद्यार्थ्यांचे उज्ज्वल भविष्य घडते,” असे प्रेरणादायी विचार व्यक्त केले.
शाळेचे चेअरमन श्री. संदीप काटे यांनी सर्व शिक्षकांना गुरुपौर्णिमेच्या शुभेच्छा देत, शिक्षण क्षेत्रातील त्यांच्या समर्पित कार्याचे कौतुक केले. त्यांनी विद्यार्थ्यांना शिक्षकांचा आदर करण्याचा आणि त्यांच्या मार्गदर्शनातून उत्तम नागरिक बनण्याचा संदेश दिला.
या प्रसंगी शाळेतील सर्व शिक्षकांचा सन्मान करण्यात आला. संपूर्ण कार्यक्रमात आनंद, आदर आणि संस्कारमय वातावरण अनुभवायला मिळाले. गुरुपौर्णिमेच्या निमित्ताने विद्यार्थ्यांनी आपल्या गुरुजनांप्रती कृतज्ञता व्यक्त करत, ज्ञान, संस्कार आणि मूल्यांचे महत्त्व अधोरेखित केले.
“गुरू म्हणजे ज्ञानाचा अखंड दीप, जो विद्यार्थ्यांच्या जीवनातील अज्ञानाचा अंधार दूर करून यशाचा मार्ग उजळून टाकतो.”
