पिंपरी, (महाराष्ट्र ब्रेकिंग न्यूज) – पुणे महानगर प्रदेश विकास प्राधिकरणाने गत काही दिवसात नागरिकांसाठी उभारलेल्या उत्कृष्ट सेवा – सुविधांची शासनाने दखल घेत मुख्यमंत्री – १०० दिवस कृती आराखड्याच्या उपक्रमात पीएमआरडीएला महाराष्ट्रात तिसरे स्थान मिळाले. गुणवत्ता परिषद भारत (क्वालिटी कौन्सिल ऑफ इंडिया QCI) यांनी केलेल्या अंतिम मूल्यांकनात पीएमआरडीएला १०० पैकी ७६.०२ गुण मिळाले.
पीएमआरडीएने अल्प कालावधीतच सर्वसामान्य नागरिकांचे हित केंद्रस्थानी ठेवून उभारलेल्या अपेक्षित सोयी सुविधा आणि प्रशासकीय कामकाजातील गतीमानतेच्या आधारावर राज्य शासनाने त्यांच्या उत्कृष्ट कामगिरीवर शुक्रवारी (दि.१६) शिक्कामोर्तब केले. प्रशासकीय कामकाजातील नाविन्यता, लोकाभिमुख प्रशासन व्यवस्था, आधुनिक तंत्रज्ञानाचा अवलंब अशा काही मुद्द्यांच्या आधारे पीएमआरडीएने आपले वर्चस्व या विशेष कार्यक्रमातून सिद्ध करत राज्यभरात अल्पावधीतच आपली छाप सोडली.
मुख्यमंत्री – १०० दिवस कृती आराखड्याच्या या दुसऱ्या टप्प्यातील विशेष उपक्रमात पीएमआरडीएसह राज्यभरातील ९५ महामंडळे, प्राधिकरणे, शासकीय / निमशासकीय संस्था, कंपन्या आदींचा समावेश होता. केंद्र शासनाची नामांकन करणारी अव्वल संस्था असलेल्या क्यूसीआय टीमने १४ मे २०२५ रोजी १० महत्त्वपूर्ण मुद्द्यांच्या अनुषंगाने केलेल्या मूल्यमापनात पीएमआरडीएने बाजी मारली. मुख्यमंत्री देवेंद्र फडणवीस यांनी शुक्रवारी जाहीर केलेल्या निकालात ७६.०२ गुणांच्या आधारे पीएमआरडीएला राज्यातून तिसरे स्थान मिळाले. पहिल्या क्रमांकावर झोपडपट्टी पुनर्वसन प्राधिकरण ८२.१६ गुणांसह प्रथम तर महाराष्ट्र राज्य वीज निर्मिती कंपनी मर्यादितने ७७.१९ गुण घेत दुसरे स्थान मिळवले. महाराष्ट्र ऊर्जा विकास अभिकरण ६६.३७ गुणांसह चौथ्या तर महाराष्ट्र औद्योगिक विकास महामंडळ ६५.१४ गुण मिळवत पाचव्यास्थानी राहिले.
या निकषांवर झाले मूल्यमापन
क्यूसीआय टीमने विविध १० मुद्द्यांच्या अनुषंगाने मूल्यमापन करून आपला अहवाल राज्य शासनाला सादर केला होता. यात संकेतस्थळ, केंद्र शासनाची सुसंवाद, स्वच्छता, तक्रार निवारण, कार्यालयीन सोयी सुविधा, कामकाजातील सुधारणा, अधिकारी कर्मचारी प्रशिक्षण, सेवा विषयक बाबी, न्यायालयीन बाबी, कृत्रिम बुद्धिमत्ता तंत्रज्ञानाचा वापर, आर्थिक व औद्योगिक गुंतवणुकीस प्रोत्साहन, सुकर जीवनमान, कार्यालयीन व्यवस्थापन सुधारणा या निकषांच्या आधारे मूल्यमापन करण्यात आले.
या प्रकल्प, उपक्रमामुळे मिळाला पुरस्कार
• सुलभ, सुंदर वेबसाईट, RTS सेवांचे सुलभीकरण
• स्वच्छ व सुसज्ज ऑफीस, अधिकाऱ्यांच्या भेटीच्या वेळा निश्चित
• अभ्यागतांसाठी कार्यालयात सोयी सुविधा, स्वच्छ पाणी, प्रसाधनगृहे
• बांधकाम परवानग्यांसाठी ऑनलाईन BPMS प्रणाली
• विकास योजना व नगर रचनेसाठीच्या सूचना, हरकतीसाठी आणि ड्रोन सर्वेक्षणाला AI ची जोड
• औद्योगिक गुंतवणुकीस चालना देण्यासाठी ३१ हजार कोटींचे नियोजित पायाभूत प्रकल्प
• नदीचा उगम ते संगमापर्यंत प्रदूषण निर्मूलनासाठी उपाययोजना करणारे एकमेव प्राधिकरण
• स्वतंत्र आपत्ती प्रतिसाद पथक (PDRF)असणारे राज्यातील एकमेव महामंडळ
• प्राधिकरण निर्मित Geoportal द्वारे विकास आराखडा, मोजणी, बांधकाम, अतिक्रमण निर्मूलन, जमीन अधिकार अभिलेख आदी सेवांचे एकत्रीकरण
• अत्याधुनिक Digital twin तंत्रज्ञानाच्या साहाय्याने विविध विभागातील कामकाजात सुधारणा
जनहित डोळ्यासमोर ठेवून उभारलेल्या सोयी सुविधा आणि प्रशासकीय कामकाजात शासनाला अपेक्षित असलेल्या गतिमानतेच्या आधारावर पीएमआरडीएला मिळालेले हे मोठे यश आहे. मुख्यमंत्री – १०० दिवसाच्या कार्यक्रमात आमच्या सर्व अधिकारी, कर्मचाऱ्यांनी घेतलेली मेहनत आणि लोकप्रतिनिधी, नागरिकांचे सहकार्य या आधारावर पीएमआरडीएच्या निर्मितीपासून अल्पावधीतच आम्ही राज्यात नावलौकिक मिळवू शकलो हे आमच्यासाठी गौरवास्पद आहे. आगामी काळात पीएमआरडीएतील सोयी सुविधा, प्रशासकीय सेवा या अधिकाधिक लोकाभिमुख कशा करता येतील, त्या दृष्टीने आमचे प्रयत्न असतील.
– डॉ. योगेश म्हसे, महानगर आयुक्त तथा मुख्य कार्यकारी अधिकारी, पीएमआरडीए
