पिंपरी, (महाराष्ट्र ब्रेकिंग न्यूज) — मराठा सेवा संघाच्या वतीने आयोजित करण्यात आलेल्या ‘जिजाऊ रथयात्रे’चे पिंपरी-चिंचवड शहरात भव्य आयोजन करण्यात आले. सर्व जातीधर्मात सामाजिक सलोखा निर्माण करण्याच्या उद्देशाने सुरू झालेल्या या रथयात्रेचा समारोप डॉ. बाबासाहेब आंबेडकर पुतळ्याच्या मागील मैदानावर सायंकाळी आठ वाजता झाला.
या ऐतिहासिक सोहळ्यात आमदार शंकर जगताप, माजी नगरसेवक अभिषेक बारणे, संभाजी ब्रिगेडचे महासचिव सौरभदादा खेडेकर, मराठा सेवा संघाचे मार्गदर्शक अर्जुन तानपुरे, मराठा सेवा संघाचे शहराध्यक्ष आबासाहेब ढवळे, मराठा सेवा संघ राष्ट्रीय कार्यकारिणी सदस्य प्रकाश जाधव, संभाजी ब्रिगेडचे अभिमन्यू पवार, मनोज गायकवाड आणि जिजाऊ ब्रिगेडचे सदस्य यांच्यासह स्थानिक पदाधिकारी व नागरिक मोठ्या संख्येने उपस्थित होते.
रथयात्रेची सुरवात १८ मार्च २०२५ रोजी वेरूळ येथून झाली होती आणि महाराष्ट्रातील विविध जिल्ह्यातून फिरून ती पिंपरी-चिंचवड शहरात आली. यात्रा डांगे चौक, थेरगाव चाफेकर चौक, चिंचवड स्टेशन, अजमेरा मार्गे नेहरूनगर, पी.एम.टी. चौक, भोसरी, छत्रपती शिवाजी महाराज पुतळा, लांडेवाडी अग्निशामक केंद्र शेजारील बुद्ध विहार चौक आणि संततुकारामनगर मार्गे पिंपरीतील डॉ. आंबेडकर चौकामध्ये संपन्न झाली.
रथयात्रेचा समारोप होत असताना आयोजकांनी राष्ट्रमाता राजमाता जिजाऊ यांच्या पुतळ्याचे पूजन करून रथयात्रेचे औपचारिक स्वागत केले. यावेळी आमदार शंकर जगताप यांनी आपल्या भाषणात सामाजिक सलोखा आणि एकतेच्या महत्त्वावर भर दिला.
कार्यक्रमाच्या यशस्वी आयोजनासाठी मराठा सेवा संघाचे शहराध्यक्ष आबासाहेब ढवळे, मनोज गायकवाड आणि प्रकाश जाधव यांनी विशेष परिश्रम घेतले. या सोहळ्यात स्थानिक नागरिकांमध्ये उत्साहाचे वातावरण पहायला मिळाले.
