पिंपरी चिंचवडमध्ये १ मार्चपासून जापनीज एन्सेफलायटीस प्रतिबंधक लसीकरण मोहीम
पालक आणि शाळांना सहकार्याचे महानगरपालिकेच्या वैद्यकीय विभागातर्फे आवाहन
पिंपरी, (महाराष्ट्र ब्रेकिंग न्यूज) – सार्वजनिक आरोग्याच्या दृष्टीने महत्त्वाचे पाऊल उचलत, पिंपरी चिंचवड महानगरपालिकेच्या वैद्यकीय विभागातर्फे १ मार्च २०२५ पासून जापनीज एन्सेफलायटीस अर्थात ‘जेई’ प्रतिबंधक लसीकरण मोहीम राबविण्यात येणार आहे.
‘जेई’ हा विषाणूजन्य आजार असून, तो प्रामुख्याने १५ वर्षांखालील मुलांना होतो. या आजारामुळे गंभीर मज्जातंतू विकार होण्याची शक्यता असते, तसेच याचा मृत्यूदरही अधिक आहे. ‘जेई’ सिंड्रोम हा देशातील सार्वजनिक आरोग्य समस्यांपैकी एक आहे. कारण यामुळे मृत्यूचे प्रमाण सुमारे ३० टक्के आहे, आणि ३०-४० टक्के बरे झालेल्या मुलांमध्ये विशिष्ट परंतु मज्जातंतूशी संबंधित अपंगत्व आयुष्यभर राहते. त्यामुळे या आजारापासून बचावासाठी लसीकरण करण्याचे आवाहन पिंपरी चिंचवड महानगरपालिकेच्या वैद्यकीय विभागातर्फे करण्यात आले आहे.
लसीकरण मोहीमेचे स्वरूप
– १ मार्च २०२५ पासून संपूर्ण पिंपरी चिंचवड शहरात ही मोहीम राबविली जाणार.
– १ ते १५ वर्षे वयोगटातील सर्व मुलांचे शाळा आणि समाज स्तरावर मोफत लसीकरण करण्यात येणार.
– राष्ट्रीय लसीकरण कार्यक्रमाअंतर्गत ही लस सुरक्षित आणि प्रभावी आहे.
शाळा आणि पालकांना सहकार्य करण्याचे आवाहन
सोमवारी (२४ फेब्रुवारी) पिंपरी चिंचवड महानगरपालिका वैद्यकीय विभागातर्फे याबाबत बैठक बोलावण्यात आली होती. या बैठकीमध्ये शाळांचे आणि पालकांचे सहकार्य आवश्यक असल्याचे मत उपस्थितांनी मांडले. तसेच विद्यार्थ्यांना जेई प्रतिबंधक लसीकरणाचे महत्त्व पटवून द्यावे, पालकांसाठी जनजागृती सभा आयोजित कराव्यात, शाळेतील विद्यार्थ्यांची माहिती वैद्यकीय अधिकाऱ्यांना उपलब्ध करून द्यावी, लसीकरण सत्रासाठी जागा आणि आवश्यक सुविधा उपलब्ध करून द्याव्यात, सर्व विद्यार्थ्यांनी लस घेतली आहे याची खात्री करावी, अशा विविध सूचना देण्यात आल्या. ही बैठक महानगरपालिका आयुक्त तथा प्रशासक शेखर सिंह आणि अतिरिक्त आयुक्त विजय खोराटे यांच्या सूचनेनुसार, आरोग्य वैद्यकीय अधिकारी डॉ. लक्ष्मण गोफणे, अतिरिक्त आरोग्य वैद्यकीय अधिकारी डॉ. अभयाचंद्र दादेवार यांच्या अध्यक्षतेखाली पार पडली. यावेळी शिक्षण विभागाचे सहाय्यक आयुक्त विजयकुमार थोरात, प्रशासन अधिकारी संगीता बांगर, सहाय्यक आरोग्य वैद्यकीय अधिकारी डॉ. अंजली ढोणे, सहाय्यक आरोग्य वैद्यकीय अधिकारी डॉ. किशोरी नलावडे, सर्व्हेलन्स मेडिकल ऑफिसर डॉ. चेतन खाडे, ज्येष्ठ वैद्यकीय अधिकारी डॉ. वर्षा डांगे आणि इतर नोडल अधिकारी उपस्थित होते.
जेई प्रतिबंधक लसीकरण ही सार्वजनिक आरोग्यासाठी महत्त्वाची मोहीम आहे. पालकांनी व शिक्षकांनी या उपक्रमात सक्रीय सहभाग घ्यावा आणि प्रत्येक बालकाला लसीकरण मिळावे, यासाठी प्रयत्न करावेत. संपूर्ण समाजाने या मोहिमेस सहकार्य करून आपल्या पुढील पिढीचे आरोग्य सुरक्षित करणे आवश्यक आहे.
– शेखर सिंह, आयुक्त तथा प्रशासक, पिंपरी- चिंचवड महानगरपालिका
जेई लसीकरण मोहीम केवळ एक लसीकरण उपक्रम नसून, आपल्या मुलांच्या उज्ज्वल आणि आरोग्यदायी भविष्यासाठी एक महत्त्वाचे पाऊल आहे. प्रत्येक नागरिकाने यामध्ये सक्रीय सहभाग घ्यावा आणि लसीकरणाबाबत जागरूकता निर्माण करावी. पालकांनी आणि शाळांनी सहकार्य करून या मोहिमेमध्ये आवर्जून सहभाग घ्यावा.
– विजयकुमार खोराटे, अतिरिक्त आयुक्त, पिंपरी-चिंचवड महानगरपालिका
जेई लसीकरण हा एक प्रभावी आणि सुरक्षित उपाय असून, लहान मुलांना या घातक आजारापासून वाचविण्यासाठी प्रत्येकाने या मोहिमेत सक्रिय सहभाग घ्यावा. जास्तीत जास्त नागरिकांनी याबाबत जागरूक राहावे. आपल्या पाल्यांचे जीवन सुरक्षित करण्यासाठी त्यांना ही लस जरूर द्या.
– डॉ. लक्ष्मण गोफणे, वैद्यकीय विभाग प्रमुख, पिंपरी- चिंचवड महानगरपालिका
