पिंपरी, (महाराष्ट्र ब्रेकिंग न्यूज) – औद्योगिक शहर म्हणून ओळख असलेल्या पिंपरी-चिंचवडमध्ये कामगार चळवळीतील एक प्रभावी चेहरा म्हणून ओळखले जाणारे ज्येष्ठ नेते केशव घोळवे यांचे नाव सध्या राजकीय चर्चेच्या केंद्रस्थानी आले आहे. येऊ घातलेल्या विधान परिषद निवडणुकीच्या पार्श्वभूमीवर भारतीय जनता पक्षाने त्यांना उमेदवारी द्यावी, अशी ठाम मागणी कामगार संघटनांकडून पुढे येत आहे.
अत्यंत साध्या आणि संघर्षमय जीवनातून पुढे आलेल्या घोळवे यांनी उसतोड मजूर कुटुंबातून आपली वाटचाल सुरू केली. शिक्षणासाठी विविध कामे करत त्यांनी आयटीआयपर्यंतचे शिक्षण पूर्ण केले आणि औद्योगिक क्षेत्रात वेल्डर म्हणून करिअरची सुरुवात केली. त्यानंतर थरमॅक्समध्ये कायम नोकरी मिळाल्यानंतर त्यांनी केवळ कर्मचारी म्हणून नव्हे, तर कामगारांच्या हक्कांसाठी लढणारा नेता म्हणून स्वतःची वेगळी ओळख निर्माण केली.
कामगार संघटनांमधील त्यांच्या कार्यकाळात त्यांनी उत्पादनक्षमता वाढ, व्यवस्थापनाशी सुसंवाद आणि आधुनिक औद्योगिक पद्धतींचा अवलंब यावर भर दिला. ‘कायझेन’, ‘5S’, ‘TPM’ आणि ‘TQM’ यांसारख्या तत्त्वांचा वापर करून त्यांनी संघटनात्मक कामाला नवी दिशा दिली. त्यांच्या नेतृत्वाखाली कामगार संघटनांनी गुणवत्ता आणि कार्यक्षमतेत महत्त्वपूर्ण प्रगती साधली.
२००४ मध्ये ‘श्रमिक एकता महासंघ’ची स्थापना करून त्यांनी अनेक छोट्या-मोठ्या संघटनांना एकत्र आणले आणि कामगार चळवळीला व्यापक व्यासपीठ उपलब्ध करून दिले. त्यांच्या कार्याची दखल देश-विदेशातही घेतली गेली असून, विविध आंतरराष्ट्रीय अभ्यास दौऱ्यांद्वारे त्यांनी औद्योगिक व्यवस्थापनाचा सखोल अभ्यास केला.
राजकीय क्षेत्रातही त्यांनी आपला ठसा उमटवला. प्रतिकूल परिस्थितीतही पिंपरी-चिंचवड महापालिकेत नगरसेवक म्हणून निवडून येत त्यांनी ‘सामान्य माणसाचा विजय’ सिद्ध केला. उपमहापौर पदावर काम करताना त्यांनी शहरातील सामाजिक आणि कामगारवर्गीय प्रश्नांवर ठोस भूमिका घेतली. दिव्यांगांसाठी सुविधा, किमान वेतनाची अंमलबजावणी, आशा सेविकांचे प्रश्न आणि शिक्षण क्षेत्रातील मुद्द्यांवर त्यांनी सक्रियपणे काम केले.
सध्या भारतीय जनता पक्षात सक्रिय असलेले घोळवे विविध समित्यांवर काम करत कामगारांच्या हितासाठी आवाज उठवत आहेत. त्यांच्या दीर्घ अनुभवामुळे आणि तळागाळातील घटकांशी असलेल्या घट्ट नात्यामुळे ते विधान परिषदेसाठी योग्य उमेदवार असल्याचे मत कामगार वर्गातून व्यक्त होत आहे.
कामगारांचे म्हणणे स्पष्ट आहे—तळागाळातील प्रश्नांची खरी जाण असलेले नेतृत्व विधान परिषदेत गेले, तर कामगारांच्या समस्यांना न्याय मिळू शकतो. त्यामुळे भाजप नेतृत्वाने केशव घोळवे यांना संधी द्यावी, अशी मागणी आता अधिक तीव्र होत आहे.
आता पक्षश्रेष्ठी या मागणीवर काय निर्णय घेतात, याकडे सर्वांचे लक्ष लागले आहे.
