मालमत्ता कराची थकबाकी असणारे हॉटेल, मॉल, पेट्रोल पंप, चित्रपटगृहे, मंगल कार्यालये, औद्योगिक कारखाने, खासगी रुग्णालये महापालिकेच्या रडारवर
पिंपरी, (महाराष्ट्र ब्रेकिंग न्यूज ) – महापालिकेच्या कर आकारणी व कर संकलन विभागाकडून थकबाकीदारांवर जप्तीची कारवाई सुरू आहे. यामध्ये बिगरनिवासी, औद्योगिक, मिश्र मालमत्तांचा समावेश आहे. आता एक लाखाहून जास्त रकमेच्या थकबाकीदारांच्या मालमत्ता तत्काळ जप्त करण्यात येणार आहेत. त्याबाबतचा आदेश संबंधित विभागीय कार्यालयातील प्रशासन अधिकाऱ्यांना दिला आहे.
एक लाखापेक्षा अधिक रक्कम थकबाकी असणाऱ्या आस्थापनांची यादी करसंकलन विभागाने तयार केली आहे. ती यादी संबंधित विभागीय कार्यालयांना पाठवली आहे. त्यांच्यावर कारवाई करण्याचा आदेश दिला आहे. तसेच, अशा मालमत्तांची यादी वर्तमानपत्रातून प्रसिद्ध केली जाणार आहे. थकबाकीदारांच्या आस्थापनांबाहेर बँड पथकाकडून बँड वाजविण्यात येणार आहे. या मालमत्तांवर चालू स्थितीमध्येही जप्ती करण्याचे आदेश करसंकलन विभागाने दिले आहेत.
आतापर्यंतची कारवाई
जप्त मालमत्ता ः ४१८
एकूण थकबाकी ः ११,३७,२३,१९८
कारवाईवेळी भरणा
थकबाकीदार ः १५११
भरणा केलेली रक्कम ः २६,९२,७३,७४९
थकबाकीदारांना वारंवार आवाहन करूनही मिळकतकराचा भरणा केला जात नाही. अशा मालमत्तांवर जप्तीच्या कारवाईसाठी कठोर पाऊले उचलावीत असेही करसंकलन कार्यालयाने आदेशात म्हटले आहे.
असे आहेत थकबाकीदार
खासगी संस्था, खासगी महावि‌द्यालये व शाळा, हॉटेल, खासगी रुग्णालये, पेट्रोल पंप, औद्योगिक कारखाने, शोरूम, मंगल कार्यालये, बँका, मॉल, चित्रपटगृहे
शहरातील थकबाकीदारांना वारंवार कर भरण्याचे आवाहन केले आहे. एक लाखाहून जास्त रक्कम थकीत असणाऱ्या मालमत्तांवर कारवाई करण्याचा आदेश दिला आहे. त्यानुसार जप्तीची कारवाई सुरू आहे. शहरातील बिगरनिवासी, औद्योगिक, मिश्र मालमत्ता प्राधान्याने जप्त करण्यात येत आहेत. मालमत्ताधारकांनी थकीत कराचा तत्काळ भरणा करून जप्तीची कारवाई टाळावी.
– प्रदीप जांभळे पाटील, अतिरिक्त आयुक्त, महापालिका
एक लाख रुपयांपेक्षा जास्त थकबाकी असलेली हॉटेल, मॉल, पेट्रोल पंप, चित्रपटगृहे, मंगल कार्यालये, औद्योगिक कारखाने, खासगी रुग्णालये आदी आस्थापनांवर जप्तीची सूचना विभागीय कार्यालयांना दिली आहे. आस्थापना मालकांनी मालमत्ता कर भरल्याची खात्री करावी. कारवाईनंतर संबंधित आस्थापना चालू स्थितीच बंद झाल्यास महापालिका कोणत्याही प्रकारे जबाबदार असणार नाही.
– अविनाश शिंदे, सहाय्यक आयुक्त, कर आकारणी व कर संकलन विभाग, महापालिका
