चिंचवडची जागा राष्ट्रवादीकडे द्या अन्यथा दुसरा पर्याय निवडण्याचा राष्ट्रवादीच्या कार्यकर्त्यांचा इशारा!
पिंपरी, (महाराष्ट्र ब्रेकिंग न्यूज ) – उपमुख्यमंत्री अजित पवार यांच्याकडे चिंचवडच्या जागेची मागणी करणार आहाेत. राष्ट्रवादीचा एकही कार्यकर्ता भाजपचे काम करणार नाही. आमच्यापैकी ज्याला उमेदवारी मिळेल, त्या उमेदवाराच्या पाठीशी खंबीरपणे उभे राहणार आहोत, असे माजी नगरसेवक मयूर कलाटे यांनी चिंचवड येथे झालेल्या बैठकीत सांगितले.
चिंचवडमधील राष्ट्रवादीच्या सर्व माजी नगरसेवकांची बैठक झाली. माजी विरोधी पक्षनेते नाना काटे, विनोद नढे, मोरेश्वर भोंडवे, मयूर कलाटे, अतुल शितोळे, प्रशांत शितोळे, संतोष कोकणे, कैलास बारणे, माजी नगरसेविका उषा काळे यावेळी उपस्थित होते. चिंचवडमध्ये भाजपचा विद्यमान आमदार असल्याने महायुतीच्या ठरलेल्या सूत्रानुसार ही जागा भाजपकडेच कायम राहण्याची शक्यता आहे. त्यामुळे विधानसभा निवडणूक लढविण्यासाठी इच्छुक असलेल्या राष्ट्रवादीतील माजी नगरसेवक, पदाधिका-यांमध्ये अस्वस्थता निर्माण झाली आहे. काही दिवसांपूर्वी चिंचवडची जागा राष्ट्रवादीला न मिळाल्यास भाजपच्या प्रचारावर बहिष्कार घालण्याचा इशारा चार माजी नगरसेवकांनी दिला हाेता. यानंतरही पक्षाने काेणतीही दखल घेतली नाही. त्यामुळे या माजी नगरसेवकांनी ज्येष्ठ नेते शरद पवार यांचीही भेट घेतली हाेती. त्यानंतर शुक्रवारी या माजी नगरसेवकांनी ताथवडेत बैठक घेतली. निवडणूक लढविण्यासाठी तीव्र इच्छुक असलेले नाना काटे यांच्यासह बहुतांश माजी नगरसेवक बैठकीला उपस्थित होते.
ताथवडे येथे शुक्रवारी (४ ऑक्टोबर) चिंचवडमधील राष्ट्रवादीच्या सर्व माजी नगरसेवकांची बैठक झाली.त्यावेळी ही भूमिका घेण्यात आली.महापालिका निवडणुकांमध्येही भाजप उमेदवारांचे काम करायचे का, अशा संतप्त भावना उपस्थित माजी नगरसेवक, पदाधिका-यांनी व्यक्त चिंचवड मध्ये झालेल्या बैठकित केल्या. चिंचवडची जागा राष्ट्रवादीला न मिळाल्यास महाविकास आघाडीत प्रवेश करण्याचा ठराव मंजूर करण्यात आला.
