पिंपरी, (महाराष्ट्र ब्रेकिंग न्यूज) – माहिती व तंत्रज्ञानाचा वापर प्रशासकीय कामकाजात वेगाने केला जात असून पिंपरी चिंचवड महानगरपालिकेने हा वेग साध्य केला आहे. तंत्रज्ञानाच्या प्रभावी वापराने प्रशासनाच्या वतीने दिल्या जाणाऱ्या नागरी सेवांचे पारदर्शकता वाढीस लागून त्यांचे सुलभीकरण नक्कीच गतीने होईल, असे मत केंद्र सरकारच्या इलेक्ट्रॉनिक्स आणि माहिती तंत्रज्ञान विभागाचे सहसचिव संकेत भोंडवे यांनी मांडले. पिंपरी चिंचवड महानगरपालिकेकडून माहिती व तंत्रज्ञानाचा वापर करून राबवण्यात येणाऱ्या विविध प्रकल्पांचे भोंडवे यांनी कौतुक देखील केले.
पिंपरी चिंचवड महानगरपालिकेला सोमवारी (२६ मे) संकेत भोंडवे यांच्या नेतृत्वाखाली भारतीय प्रशासकीय सेवेतील सनदी अधिकाऱ्यांच्या शिष्टमंडळाने भेट दिली. या शिष्टमंडळात मध्यप्रदेश राज्यातील इंदूर महानगरपालिकेचे आयुक्त शिवम वर्मा, अतिरिक्त आयुक्त अभिलाष शर्मा, रेवा महानगरपालिका आयुक्त सौरभ सोनवणे, मध्यप्रदेश सरकारच्या नगर विकास आणि प्रशासन विभागाचे अपर आयुक्त डॉ.परिक्षित झाडे यांचा समावेश होता. यावेळी पिंपरी चिंचवड महानगरपालिकेचे माजी आयुक्त तथा पुण्याचे माजी विभागीय आयुक्त दिलीप बंड यांची विशेष उपस्थिती होती.
पिंपरी चिंचवड महानगरपालिकेचे आयुक्त तथा प्रशासक शेखर सिंह यांनी सुरुवातीला शिष्टमंडळाचे स्वागत केले. त्यानंतर त्यांनी महानगरपालिकेत माहिती व तंत्रज्ञानाचा वापर करून राबवण्यात येत असलेल्या विविध प्रकल्पांची माहिती दिली. याप्रसंगी पिंपरी चिंचवड महापालिका अतिरिक्त आयुक्त तृप्ती सांडभोर, शहर अभियंता मकरंद निकम, नगर रचना उपसंचालक प्रसाद गायकवाड, सह शहर अभियंता बापू गायकवाड, उपायुक्त अण्णा बोदडे, विशेष अधिकारी किरण गायकवाड, उप अभियंता सुनिल पवार, दिव्यांग भवन फाऊंडेशनचे मुख्य कार्यकारी अधिकारी परेश गांधी आदी उपस्थित होते.
‘पिंपरी चिंचवड महापालिकेकडून प्रशासकीय कामकाजात माहिती तंत्रज्ञानाचा वापर उत्तम पद्धतीने केला जात असल्याचे येथे राबवण्यात येत असलेल्या विविध प्रकल्पांवरून दिसून येत आहे. यामुळे महापालिकेचे कामकाज गतीने व लोकाभिमूख होत असून या प्रकल्पांमुळे महापालिकेच्या उत्पन्नात देखील वाढ होत असल्याचे आकडेवारीवरून दिसून येत आहे. येथील बहुतांश प्रकल्प इतर महापालिकांमध्ये सहज राबवता येतील,’ असे भोंडवे म्हणाले. शहरी विकासाचा वेग साध्य करताना नागरी गरजांचा प्रामुख्याने विचार केला पाहिजे. शिवाय भविष्यातील वाढणारा विस्तार आणि पायाभूत सुविधा निर्माण करताना येणाऱ्या अडचणींचा विचार देखील करणे गरजेचे आहे. पिंपरी चिंचवड शहरात उत्तम प्रकारे हरित पट्टे विकसित केले आहेत. वृक्षपुनर्रोपणाचा यशस्वी प्रयोग महापालिकेने राबविला. अशा प्रकारच्या मॉडेलचे देशातील इतर शहरांनी देखील अनुकरण करायला हवे. पर्यावरणाचा प्राधान्याने विचार करून विकास प्रकल्प राबविणे गरजेचे असून जैवविविधता विभागासारखा स्वतंत्र विभाग प्रत्येक स्थानिक स्वराज्य संस्थांमध्ये असायला हवा, असेही भोंडवे म्हणाले. स्थानिक पातळीवरील समस्यांचे निराकरण करण्यासाठी आधुनिक पद्धतीने विकसित होणाऱ्या माहिती तंत्रज्ञान क्षेत्राचा उपयोग होऊ शकतो. देशात विविध ठिकाणी असा यशस्वी वापर सुरू आहे. त्यामुळे विविध प्रशासकीय यंत्रणानी केलेल्या अशा तंत्रज्ञानाचे आदान प्रदान करण्यासाठी स्थानिक स्वराज्य संस्थांनी पुढाकार घेतला पाहिजे, असेही भोंडवे यावेळी म्हणाले.
आयुक्तांनी दिली विविध प्रकल्पांची माहिती
आयुक्त शेखर सिंह यांनी यावेळी स्मार्ट सारथी, ई-ऑफिस प्रणाली, दस्तऐवज व्यवस्थापन प्रणाली, सॅप (SAP), भौगोलिक माहिती प्रणाली (GIS), जीआयएस लेअर, डिजिटल एलिव्हेशन मॉडेल, सिटी हब फॉर डेटा कम्युनिकेशन (सीएचडीसी), हरीत सेतू मास्टर प्लॅन, पंतप्रधान गती शक्ती अभियान, तक्रार निराकरण प्रणाली, वेस्ट टू एनर्जी प्रकल्प, मिळकतकर प्रणाली, जीआय बेस रोड एसेट मॅनेजमेंट सिस्टिम, टीडी आर धोरण, शहरातील मालमत्तांचा केलेला ड्रोन सर्व्हे, एआय आधारित अनधिकृत होर्डिंगचा शोध, ई-रुपी प्रकल्प, दिव्यांग भवन, कौशल्यम प्रकल्प, नवी दिशा आदी प्रकल्पांची माहिती शिष्टमंडळाला दिली. हे प्रकल्प राबवल्यामुळे महानगरपालिकेला व शहरातील नागरिकांना कशा पद्धतीने फायदा झाला, याची आकडेवारीसह माहिती यावेळी त्यांनी दिली.
दिव्यांग भवनला भेट
पिंपरी चिंचवड महानगरपालिकेने उभारलेल्या दिव्यांग भवनला सहसचिव संकेत भोंडवे व त्यांच्यासोबत आलेल्या शिष्टमंडळाने भेट दिली. दिव्यांगांसाठी अडथळा विरहित व सुलभ करण्यात आलेली दिव्यांग भवनाची रचना, दिव्यांगांसाठी अत्याधुनिक उपकरणांसह उपलब्ध असणाऱ्या थेरपी, दिव्यांगांसाठी घेण्यात येत असलेले प्रेरणादायी आणि विकासात्मक कार्यक्रम, सुलभ व प्रगत डिजिटल लायब्ररी आदी माहिती यावेळी आयुक्त शेखर सिंह यांनी शिष्टमंडळाला दिली.
