पिंपरी, (महाराष्ट्र ब्रेकिंग न्यूज) – पिंपरी-चिंचवड महापालिकेच्या आगामी निवडणुकीसाठी प्रभागनिहाय प्रारूप मतदारयादी प्रसिद्ध करण्यात आली आहे. त्यानुसार प्रभाग क्रमांक एक चिखली गावठाण-माेरेवस्तीमध्ये सर्वाधिक ७४ हजार ३४४, तर प्रभाग क्रमांक २३ थेरगाव गावठाण-पडवळनगरमध्ये सर्वांत कमी ३४ हजार ७६६ मतदार आहेत. शहरात १७ लाख १३ हजार ८९१ मतदार आहेत.
महापालिका निवडणुकीसाठी विधानसभेची मतदारयादी वापरण्यात येणार आहे. एक जुलै २०२५ पर्यंतची मतदारसंख्या गृहीत धरण्यात आली आहे. त्यानुसार प्रारूप यादी प्रसिद्ध केली आहे. शहरात चार विधानसभा मतदार संघ येतात. चिंचवड मतदारसंघात सर्वाधिक सहा लाख ७६ हजार ६३८ मतदार आहेत. त्या खालोखाल भोसरी (सहा लाख २४ हजार १५२), पिंपरी (तीन लाख ९९ हजार ८११) आणि भोर (ताथवडे गाव १३ हजार २९०) मतदारसंघाचा क्रमांक लागतो.
महापालिकेच्या ३२ प्रभागांत १७ लाख १३ हजार ८९१ मतदार आहेत. त्यांमध्ये नऊ लाख चार हजार ८१५ पुरुष, आठ लाख सात हजार १३९ महिला आणि १९७ इतर मतदार आहेत. प्रभाग क्रमांक एक चिखलीत सर्वाधिक ७४ हजार ३४४, त्या खालाेखाल प्रभाग क्रमांक तीन चऱ्होली, डुडुळगावमध्ये ७२ हजार ४१६, प्रभाग क्रमांक १६ रावेत-किवळेमध्ये ७२ हजार २२७ मतदार आहेत. प्रभाग क्रमांक २३ थेरगाव गावठाण-पडवळनगरमध्ये सर्वात कमी म्हणजेच ३४ हजार ७६६ मतदार आहेत.
पाच लाख मतदार वाढले
सन २०१७ मध्ये झालेल्या महापालिका निवडणुकीत ११ लाख ९२ हजार ८९ मतदार होते. आता सुमारे पावणेनऊ वर्षांनंतर महापालिका निवडणूक होत आहे. या कालावधीत शहराची मतदारसंख्या पाच लाखांनी वाढली आहे. आगामी महापालिका निवडणुकीत १७ लाख १३ हजार ८९१ मतदार मतदानाचा हक्क बजाविणार आहेत.
सावित्रीबाई फुले सभागृहात यादी उपलब्ध
पिंपरीतील सावित्रीबाई फुले सभागृहात मतदारयादी विक्रीस उपलब्ध आहे. एका पानाची किंमत दोन रुपये ठेवण्यात आली आहे. प्रभाग क्रमांक तीनच्या मतदारयादीची पाने सर्वाधिक नऊ हजार ४३ आहेत. या यादीची किंमत १८ हजार ८६ रुपये आहे.
शहरातील प्रत्येक मतदाराने स्वतःचे नाव योग्यरीत्या नोंदले आहे, याबाबत खात्री करावी. आवश्यक असल्यास हरकती, सूचना वेळेत दाखल कराव्यात. प्रारूप मतदारयादीवर येणाऱ्या हरकती व सूचनांवर निवडणूक आयोगाच्या नियमान्वये कार्यवाही करण्यात येईल, असे अतिरिक्त आयुक्त विजयकुमार खोराटे यांनी सांगितले.
