पिंपरी, (महाराष्ट्र ब्रेकिंग न्यूज) – पिंपरी-चिंचवड महानगरपालिका निवडणुकीच्या रणधुमाळीत प्रभाग क्रमांक १८ सध्या चर्चेच्या केंद्रस्थानी आला आहे. “आम्हाला सुरेश भोईरच नगरसेवक म्हणून हवेत,” असा ठाम सूर मतदारांमधून उमटू लागल्याने राजकीय समीकरणे स्पष्ट होताना दिसत आहेत. भाजपचे अधिकृत उमेदवार सुरेश शिवाजी भोईर यांना मिळणारा वाढता जनसमर्थन हा केवळ प्रचाराचा परिणाम नसून, त्यांच्या दीर्घकालीन सामाजिक संपर्क, कार्यपद्धती आणि विकासाभिमुख प्रतिमेचा परिपाक असल्याचे राजकीय विश्लेषकांचे मत आहे.
प्रचारादरम्यान भोईर यांनी मतदारांशी थेट संवाद साधत प्रभागातील मूलभूत प्रश्न—रस्ते, पाणीपुरवठा, ड्रेनेज, स्वच्छता, आरोग्य व सुरक्षा—यावर ठोस भूमिका मांडली. याउलट विरोधकांकडे केवळ आश्वासनांची पुनरावृत्ती असल्याची भावना मतदारांमध्ये निर्माण झाली आहे. “दिसणारा माणूस, ऐकणारा माणूस आणि काम करणारा माणूस म्हणून भोईर ओळखले जातात,” असे मत अनेक नागरिक व्यक्त करत आहेत.
या निवडणुकीत युवक, महिला आणि ज्येष्ठ नागरिक हे तीन महत्त्वाचे घटक निर्णायक ठरत आहेत. युवकांना रोजगार व क्रीडा सुविधांचे आश्वासन, महिलांना सुरक्षितता व स्वावलंबनाचा अजेंडा, तर ज्येष्ठांना आरोग्य व नागरी सुविधा या मुद्द्यांवर भोईर यांची मांडणी प्रभावी ठरल्याचे दिसते. त्यामुळे विविध सामाजिक घटकांतून त्यांना मिळणारा पाठिंबा व्यापक स्वरूपाचा आहे.
राजकीयदृष्ट्या पाहता, प्रभाग १८ मध्ये भाजपसाठी अनुकूल वातावरण तयार झाले असून “भोईर म्हणजे विश्वास” अशी प्रतिमा जनमानसात रुजत आहे. मतदारांचा थेट आणि स्पष्ट कौल हा प्रचाराच्या शेवटच्या टप्प्यात विरोधकांसाठी धोक्याची घंटा मानली जात आहे. एकूणच, “आम्हाला सुरेश भोईरच नगरसेवक हवेत” हा नारा आता केवळ घोषणा न राहता, प्रभाग १८ मधील मतदारांचा सामूहिक निर्णय ठरत असल्याचे चित्र सध्या स्पष्ट दिसत आहे.
