पिंपरी, (महाराष्ट्र ब्रेकिंग न्यूज) – पिंपरी–चिंचवड महापालिका निवडणुकीच्या पार्श्वभूमीवर प्रभाग क्रमांक २८ मध्ये शत्रुघ्न काटे यांच्या नेतृत्वाखालील पॅनलचा जनसंवाद दौरा जोरदार गतीने सुरू असून, नागरिकांच्या उत्स्फूर्त प्रतिसादामुळे संपूर्ण प्रभागात राजकीय वातावरण तापले आहे. डॉ. कुंदा भिसे, संदेश काटे आणि अनिता काटे या चौकडीने घरोघरी जाऊन थेट संवाद साधत “काम, विकास आणि विश्वास” या मुद्द्यांवर मतदारांना साद घातली आहे.
या दौऱ्यात महिला, युवक, ज्येष्ठ नागरिक तसेच व्यापारी वर्ग मोठ्या संख्येने सहभागी होत असून, “आमचा उमेदवार, आमचा विकास” अशी स्पष्ट भावना नागरिकांच्या चेहऱ्यावर दिसून येत आहे. डॉ. कुंदा भिसे यांनी महिलांच्या सक्षमीकरणासाठी केलेल्या कामांची माहिती देत आरोग्य, शिक्षण व सामाजिक सुरक्षेच्या मुद्द्यांवर ठाम भूमिका मांडली. तर संदेश काटे यांनी युवकांच्या रोजगार, क्रीडा व आधुनिक सुविधा या विषयांवर आक्रमकपणे आवाज उठवला. अनिता काटे यांनी स्वच्छता, पाणीपुरवठा व नागरी सोयीसुविधांबाबत ठोस विकास आराखडा नागरिकांसमोर ठेवला.
शत्रुघ्न काटे यांनी यावेळी विरोधकांवर निशाणा साधत, “फक्त आश्वासनांचे राजकारण आता चालणार नाही; प्रभाग २८ ला हवे आहे काम करणारे नेतृत्व,” असा ठाम संदेश दिला. जनसंवाद दौऱ्यात नागरिकांनी प्रश्नांची सरबत्ती करताना अपेक्षा व्यक्त केल्या, तर पॅनलनेही प्रत्येक मुद्द्यावर स्पष्ट उत्तर देत विश्वासार्हता अधोरेखित केली.
एकूणच, प्रभाग २८ मध्ये शत्रुघ्न काटे यांच्या पॅनलचा हा जनसंवाद दौरा केवळ प्रचारापुरता मर्यादित न राहता, जनतेच्या मनात विजयाचा विश्वास पेरणारा ठरत आहे. वाढता प्रतिसाद आणि उत्साह पाहता, येत्या निवडणुकीत ही चौकडी निर्णायक आघाडी घेण्याच्या दिशेने वेगाने आगेकूच करत असल्याचे चित्र स्पष्ट दिसत आहे.
