काळेवाडीत राजकीय भूकंप! चंद्रशेखर बावनखुळे यांच्या उपस्थितीत राष्ट्रवादीच्या कार्यकर्त्यांचा भाजपमध्ये जाहीर प्रवेश
पिंपरी, (महाराष्ट्र ब्रेकिंग न्यूज) – काळेवाडी परिसरात राजकीय वातावरण तापले असतानाच राष्ट्रवादी काँग्रेसला जबरदस्त धक्का बसला आहे. महाराष्ट्र राज्याचे महसूल मंत्री व भाजपचे ज्येष्ठ नेते चंद्रशेखर बावनखुळे यांच्या उपस्थितीत काळेवाडीतील राष्ट्रवादी काँग्रेस (अजितदादा पवार गट) चे अनेक सक्रिय कार्यकर्ते यांनी भारतीय जनता पार्टीमध्ये जाहीर प्रवेश केला. हा प्रवेश म्हणजे राष्ट्रवादीच्या गोटात पडलेला मोठा भगदाड असून स्थानिक राजकारणात खळबळ उडाली आहे.
आजच महाराष्ट्र राज्याचे मुख्यमंत्री माननीय अजित पवार यांची काळेवाडीमध्ये जाहीर सभा सुरू असतानाच राष्ट्रवादीतील कार्यकर्त्यांनी भाजपचा झेंडा हाती घेतल्याने राजकीय वर्तुळात जोरदार चर्चा सुरू झाली आहे. ‘सभेच्या व्यासपीठावर ताकद दाखवली जात असताना, मैदानात मात्र कार्यकर्ते हातातून निसटत आहेत’ अशी टीका यानिमित्ताने होत आहे.
भाजपच्या ठोस नेतृत्वावर, विकासाभिमुख धोरणांवर आणि संघटनात्मक बळावर विश्वास ठेवून हा निर्णय घेतल्याचे नव्याने प्रवेश केलेल्या कार्यकर्त्यांनी स्पष्ट केले. चिंचवड विधानसभा मतदारसंघात भाजप अधिक मजबूत करण्याचा निर्धार करत त्यांनी भाजपसोबत ठाम उभे राहण्याची भूमिका घेतली.
या पक्षप्रवेशावेळी भाजपचे स्थानिक नेते, पदाधिकारी व कार्यकर्त्यांची मोठी उपस्थिती होती. प्रभाग क्रमांक २२ चे भाजप उमेदवार विनोद नढे, तसेच भाजपचे प्रभारी नेते काळुराम बारणे यांच्या विश्वासाला साथ देण्यासाठी व भाजपला मजबूत करण्यासाठी कार्यकर्त्यांनी प्रवेश केला. भाजपमध्ये प्रवेश करणाऱ्या कार्यकर्त्यांनी येत्या महापालिका निवडणुकीत भाजपला निर्णायक विजय मिळवून देण्यासाठी काम करण्याची ग्वाही दिली.
या पक्षप्रवेशामुळे काळेवाडी व चिंचवड परिसरातील राजकीय समीकरणे झपाट्याने बदलत असून राष्ट्रवादी काँग्रेससाठी हा मोठा धक्का मानला जात आहे. भाजपची ताकद दिवसेंदिवस वाढत असताना विरोधकांच्या गोटात अस्वस्थता स्पष्टपणे दिसून येत आहे.
भाजपमध्ये प्रवेश करणाऱ्यांमध्ये बाबासाहेब जगताप, राजू पवार, देवेन मोरवाणी, जुही शहादुद्दीन, राजेंद्र मोल्ले, सिताराम जगताप, उमाकांत भोईर, मोनिका गोरे, शीतल अवाड, विशाल पवार, ज्योती वाघमारे, अनिल रामपुरेकर, शुभम उनावणे, अखिलेश कदम, योगेश यादव आदी कार्यकर्त्यांचा समावेश आहे.
हा जाहीर पक्षप्रवेश म्हणजे काळेवाडीतील राजकारणात भाजपच्या वाढत्या प्रभावाचा स्पष्ट संकेत असून राष्ट्रवादी काँग्रेससमोर आगामी काळात मोठे आव्हान उभे राहण्याची चिन्हे दिसत आहेत.
