पिंपरी चिंचवडमध्ये तिरंगा रॅलीचा उत्साह; राष्ट्रप्रेमी, माजी सैनिक, राजकीय नेते, हजारो नागरिकांचा उत्स्फूर्त सहभाग!

पिंपरी, (महाराष्ट्र ब्रेकिंग न्यूज) ‘ऑपरेशन सिंदूर’च्या यशस्वीतेचा जल्लोष आणि भारतीय सैन्य दलाच्या शौर्याला सलाम करण्यासाठी पिंपरी चिंचवड शहरात एका भव्य तिरंगा रॅलीचे आयोजन करण्यात आले होते. या रॅलीत मावळ लोकसभा खासदार श्रीरंगअप्पा बारणे, आमदार महेश लांडगे, आमदार उमा खापरे, अमित गोरखे, माजी आमदार अश्विनी  जगताप, भाजपा शहराध्यक्ष शत्रुघ्न (बापू) काटे, राष्ट्रवादीचे शहराध्यक्ष योगेश बहल, शिवसेना शहरप्रमुख (शिंदे गट) बाळासाहेब वाल्हेकर, आरपीआयचे कुणाल वाव्हळकर, प्राधिकरणाचे माजी अध्यक्ष सदाशिव खाडे, युवा मोर्चा प्रदेश अध्यक्ष अनुप मोरे, युवा मोर्चा अध्यक्ष राज तापकीर, माजी महापौर नितीन काळजे, राहुल जाधव, माजी स्थायी समिती अध्यक्ष नितीन लांडगे, सीमा सावळे, अखिल भारतीय नाट्य परिषदेचे अध्यक्ष भाऊसाहेब भोईर, माजी नगरसेवक मोरेश्वर शेडगे, केशव घोळवे, सचिन चिंचवडे, शीतल शिंदे, विकास डोळस, संदीप वाघेरे, सुरेश भोईर, बाबासाहेब त्रिभुवन, सागर आंघोळकर, राजेंद्र लांडगे, सागर गवळी, योगेश लोंढे, राम वाकडकर, माजी नगरसेविका सुजाता पालांडे, सुलभा उबाळे, शर्मिला बाबर, अनुराधा गोरखे, निर्मला कुटे, मोना कुलकर्णी, आशाताई शेंडगे, आरतीताई चोंधे, कुंदा भिसे, माजी सैनिक देविदास साबळे, राजेश पिल्ले, राजू दुर्गे, माऊली थोरात, संजय मंगोडेकर, अजय पाताडे यांच्यासह पिंपरी चिंचवड शहरातील माजी सैनिक, राजकीय पदाधिकारी, बजरंग दलाचे पदाधिकारी, सामाजिक संघटना आणि हजारोंच्या संख्येने नागरिकांनी रॅलीत सहभाग घेतला.

क्रांतिगुरू लहुजी वस्ताद साळवे आणि आद्यक्रांतिकारक वासुदेव बळवंत फडके यांच्या स्मारकास पुष्प अर्पण करून या भव्य तिरंगा रॅलीची सुरुवात झाली. प्रसंगी, माजी सैनिक व अधिकारी आणि हुतात्मा सैनिकांच्या कुटुंबीयांचा सन्मान करण्यात आला.

हातात तिरंगा ध्वज घेतलेले नागरिक ‘भारत माता की जय’, ‘वंदे मातरम्’ आणि ‘भारतीय सेना झिंदाबाद’ च्या घोषणा देत होते. संपूर्ण रॅलीमध्ये देशभक्तीचा उत्साह ओसंडून वाहत होता.
‘ऑपरेशन सिंदूर’च्या यशस्वीतेची चित्रफीत दाखवण्यात आली, ज्याने उपस्थितांच्या मनात अभिमानाची भावना जागृत केली. तत्पूर्वी, माजी सैनिकांचा सत्कार करण्यात आला, ज्यांनी देशासाठी दिलेल्या योगदानाबद्दल कृतज्ञता व्यक्त करण्यात आली. 300 फूट भारतीय तिरंगी ध्वजाने सर्वांचे लक्ष वेधले.

यावेळी बोलताना माजी सैनिक मुरलीकांत पेटकर म्हणाले, “पाकिस्तानने भारताच्या शांततेच्या प्रयत्नांना नेहमीच दुर्लक्षित केले आहे. आता भारतीय सैन्याने दहशतवाद्यांना त्यांच्याच भाषेत उत्तर दिले आहे. हे ऑपरेशन दहशतवाद्यांना आणि त्यांना पाठिंबा देणाऱ्यांना एक स्पष्ट संदेश आहे की, भारत आपल्या नागरिकांच्या सुरक्षेसाठी कोणत्याही थराला जाऊ शकतो. पाकिस्तानने दहशतवादी कारवाया थांबवल्या नाहीत, तर त्यांना याहून गंभीर परिणाम भोगावे लागतील.”

माजी सैनिक देविदास साबळे यांनी आपल्या भावना व्यक्त करताना सांगितले, “आज या रॅलीमध्ये सहभागी होऊन खूप आनंद होत आहे. ‘ऑपरेशन सिंदूर’मुळे भारतीय सैन्याचे सामर्थ्य पुन्हा एकदा जगाला दिसून आले आहे. आम्ही माजी सैनिक नेहमीच देशाच्या पाठीशी खंबीरपणे उभे आहोत आणि आपल्या जवानांच्या शौर्याचा आम्हाला अभिमान आहे. या कारवाईने दहशतवाद्यांचे मनसुबे धुळीस मिळवले आहेत आणि देशातील नागरिकांमध्ये सुरक्षिततेची भावना निर्माण झाली आहे.”

उपस्थित मान्यवरांनीही यावेळी आपली प्रतिक्रिया व्यक्त करताना भारतीय सैन्य दलाचे आणि देशाचे पंतप्रधान नरेंद्र मोदी यांचे अभिनंदन केले.

मावळ लोकसभा खासदार श्रीरंगअप्पा बारणे म्हणाले, “भारतीय सैन्याने दाखवलेले शौर्य आणि पंतप्रधान नरेंद्र मोदी यांच्या नेतृत्वाखालील सरकारने घेतलेला कणखर निर्णय, याबद्दल मी त्यांचे अभिनंदन करतो. या कारवाईने दहशतवाद्यांना आणि त्यांच्या समर्थकांना एक स्पष्ट संदेश दिला आहे की, भारत आपल्या सुरक्षेबाबत तडजोड करणार नाही.”

आमदार महेश लांडगे म्हणाले, “आज पिंपरी चिंचवडमधील नागरिकांनी ज्या उत्साहाने रॅलीत सहभाग घेतला, तो पाहून खूप आनंद झाला. हे आपल्या देशाच्या सैन्याबद्दलचे प्रेम आणि आदर दर्शवते. पंतप्रधान मोदी यांनी घेतलेल्या धाडसी निर्णयामुळेच हे शक्य झाले.”

रॅलीचा समारोप भारतरत्न डॉ. बाबासाहेब आंबेडकर यांच्या स्मारकास पुष्प अर्पण करून करण्यात आला.

एकंदरीत, पिंपरी चिंचवडमधील ही तिरंगा रॅली अत्यंत यशस्वी ठरली. नागरिकांचा प्रचंड प्रतिसाद आणि त्यांची देशभक्तीची भावना निश्चितच भारतीय सैन्याला एक मोठा संदेश आणि पाठिंबा देणारी ठरली. अखिल भारतीय विद्यार्थी परिषदेच्या रिया कच्छावा, भारतीय स्त्री शक्तीच्या अधिवक्ता वर्षाताई डहाळे यांच्या भाषणाने
तिरंगा रॅलीची सांगता झाली.
भाजपा शहराध्यक्ष शत्रुघ्न काटे यांनी आभार मानले.