पिंपरी-चिंचवड महापालिका निवडणुकीच्या पार्श्वभूमीवर उपमुख्यमंत्री एकनाथ शिंदे यांच्या नेतृत्वाखालील शिवसेनेने संघटनात्मक पातळीवर मोठा आणि निर्णायक बदल केला आहे. शिवसेनेचे चिंचवड शहर विधानसभा संघटक संतोष रमाकांत सौंदणकर यांची पुणे जिल्हा संघटकपदी नियुक्ती करण्यात आली आहे. महापालिका निवडणुकीच्या तोंडावर झालेली ही नियुक्ती पक्षाच्या आगामी राजकीय रणनीतीच्या दृष्टीने अत्यंत महत्त्वाची मानली जात आहे.
खा. श्रीरंग बारणे यांच्या चिंचवड येथील जनसंपर्क कार्यालयात आयोजित कार्यक्रमात सौंदणकर यांना अधिकृत नियुक्तीपत्र प्रदान करण्यात आले. यावेळी शिवसेना उपनेत्या सुलभाताई उबाळे, इरफानभाई सय्यद, जिल्हाप्रमुख राजेश खांडभोर, जिल्हा संघटिका शैला भोंडवे, महानगरप्रमुख राजेश वाबळे, शहर प्रमुख निलेश तरस, शहर संघटिका सरिता साने, युवा सेना उप जिल्हाप्रमुख राजेंद्र तरस, माजी नगरसेविका विमल जगताप यांच्यासह शिवसेनेचे अनेक पदाधिकारी, माजी नगरसेवक आणि कार्यकर्ते उपस्थित होते. उपस्थित मान्यवरांनी सौंदणकर यांच्या कार्याचा आढावा घेत त्यांना पुढील वाटचालीस शुभेच्छा दिल्या.
नवीन जबाबदारीनुसार संतोष सौंदणकर यांचे कार्यक्षेत्र पिंपरी-चिंचवड आणि भोसरी विधानसभा मतदारसंघ असेल. संघटन बांधणी, बूथ पातळीवरील मजबुती, कार्यकर्त्यांचे नेटवर्क आणि निवडणूक नियोजन या सर्व बाबींची जबाबदारी त्यांच्याकडे सोपविण्यात आली आहे. विशेष म्हणजे २०१७ च्या महापालिका निवडणुकीत संयुक्त शिवसेनेचे ते प्रमुख रणनीतिकार होते. त्या निवडणुकीतील अनुभव, स्थानिक प्रश्नांची सखोल जाण आणि कार्यकर्त्यांशी असलेला थेट संवाद लक्षात घेता, २०२५ च्या महापालिका निवडणुकीची धुरा पुन्हा एकदा पक्षाने त्यांच्याकडे सोपवली आहे.
“शिवसेनेचे सर्वेसर्वा उपमुख्यमंत्री एकनाथ शिंदे साहेब, तसेच खासदार श्रीरंग बारणे आणि वरिष्ठ नेत्यांनी माझ्यावर टाकलेला विश्वास ही माझ्यासाठी मोठी जबाबदारी आहे. पिंपरी-चिंचवड आणि भोसरी विधानसभा मतदारसंघात शिवसेनेचे संघटन अधिक मजबूत करत तळागाळातील कार्यकर्त्यांना सोबत घेऊन काम करणार आहे. स्थानिक प्रश्न, नागरिकांच्या अपेक्षा आणि विकासाची दिशा लक्षात घेऊन २०२५ च्या महापालिका निवडणुकीत शिवसेनेला भक्कम यश मिळवून देण्यासाठी पूर्ण ताकदीने प्रयत्न करणार आहे. कार्यकर्त्यांचा सन्मान, संघटनात्मक शिस्त आणि जनतेचा विश्वास हेच आमचे भांडवल असून, त्या बळावर महापालिका निवडणुकीत शिवसेना निश्चितच यशस्वी होईल.”
संतोष सौंदणकर..
– शिवसेना, नवनियुक्त पुणे जिल्हा संघटक…
