गणपती काळात मिरवणूक मार्गावरील अतिक्रमण हटविणे आदी तक्रार वजा सूचना जनसंवाद सभेत नागरिकांनी मांडल्या
पिंपरी चिंचवड महानगरपालिका जनसंवाद सभेत नागरिकांच्या ७७ तक्रार वजा सूचना प्राप्त
पिंपरी,(महाराष्ट्र ब्रेकिंग न्यूज) – महापालिकेच्या वतीने आज पार पडलेल्या जनसंवाद सभेत एकूण ७७ तक्रार वजा सूचना प्राप्त झाल्या आहे.
आयुक्त तथा प्रशासक शेखर सिंह यांच्या आदेशानुसार पिंपरी चिंचवड शहरातील नागरिक आणि महापालिका प्रशासन यांच्यात सुसंवाद राखण्यासाठी महापालिकेच्या सर्व क्षेत्रीय कार्यालयांत महिन्याच्या दुसऱ्या आणि चौथ्या सोमवारी जनसंवाद सभेचे आयोजन करण्यात येते. त्यानुषंगाने आज ऑगस्ट महिन्याच्या चौथ्या सोमवारी अ, ब, क, ड, इ, फ, ग आणि ह या आठ क्षेत्रीय कार्यालयात आज जनसंवाद सभा पार पडली. यावेळी नेमून दिलेल्या समन्वय अधिकाऱ्यांनी जनसंवाद सभेचे अध्यक्षपद भूषविले.
आज पार पडलेल्या जनसंवाद सभेत अ, ब, क, ड, इ, फ, ग आणि ह या क्षेत्रीय कार्यालयात अनुक्रमे ३, १२, १२, १२ , ६, १३ , २ आणि १७ अशा एकूण ७७ तक्रारी वजा सूचना नागरिकांनी उपस्थित राहून मांडल्या.
यावेळी नागरिकांनी शहरातील शहरातील महत्वाच्या रस्त्यांवर उड्डाणपूल बांधावेत, वाहतुकीच्या समस्या, महिलांच्या शौचालयांची दुरावस्था, गणपती मंडळ परवानगी साठी लागणारा विलंब, गणेशोत्सव काळात वाहतुकीचे नियोजन, शहरातील खड्ड्यांची डागडुजी करणे, भाजीपाला मार्केटसाठी प्रशस्त जागा, गणपती काळात मिरवणूक मार्गावरील अतिक्रमण हटविणे आदी तक्रार वजा सूचना जनसंवाद सभेत नागरिकांनी उपस्थित राहून मांडल्या.
