निगडी सिग्नलवर मनसेचा चक्काजाम आंदोलनाचा इशारा — मेट्रोच्या कामामुळे झालेले खड्डे ठरले अपघातग्रस्तांचे कारण

पिंपरी, (महाराष्ट्र ब्रेकिंग न्यूज) – जुना मुंबई-पुणे एक्स्प्रेस हायवेवरील पुलाजवळ आणि भक्ती-शक्ती ते निगडी मार्गावरील श्रीकृष्ण मंदिराजवळ मेट्रोच्या कामामुळे निर्माण झालेल्या खड्ड्यांमुळे वाहनचालक त्रस्त; स्थानिक नागरिकांचा संताप उसळला आणि अखेर चक्काजाम आंदोलन करून प्रशासनाचे लक्ष वेधणार आहे.

 पिंपरी-चिंचवडमधील निगडी ते आकुर्डी आणि भक्ती-शक्ती ते निगडी मार्गावरील अपुरे आणि अर्धवट मेट्रो काम, तसेच मोठ्या खड्ड्यांमुळे नागरिक हैराण झाले असून महाराष्ट्र नवनिर्माण सेनेने या प्रकरणी तीव्र संताप व्यक्त करत दिनांक १० जुलै २०२५ रोजी निगडी सिग्नल येथे चक्काजाम आंदोलनाची घोषणा केली आहे.

पिंपरी-चिंचवड शहरात मेट्रोच्या कामामुळे नागरिकांचे जगणे कठीण झाले असून, विशेषतः निगडी ते आकुर्डी आणि भक्ती-शक्ती ते निगडी मार्गावरील रस्त्यांची अवस्था अतिशय दयनीय झाली आहे. जुना मुंबई-पुणे एक्स्प्रेस हायवेवरील पुलाशेजारी आणि श्रीकृष्ण मंदिर (निगडी) परिसरात रस्त्यावर मोठे खड्डे पडले असून, यामुळे गेल्या काही महिन्यांपासून अनेक अपघात झाले आहेत.

या गंभीर परिस्थितीकडे वेळोवेळी प्रशासन आणि मेट्रो अधिकाऱ्यांचे लक्ष वेधण्यात आले, निवेदने दिली गेली, मात्र कुठलीही ठोस कार्यवाही अद्याप झालेली नाही. त्यामुळे नागरिकांचा संताप शिगेला पोहोचला आहे.

या पार्श्वभूमीवर महाराष्ट्र नवनिर्माण सेनेने (मनसे) १० जुलै २०२५ (गुरुवार) रोजी निगडी सिग्नल येथे चक्काजाम आंदोलन करण्याचा निर्णय घेतला आहे. या आंदोलनात मनसेचे शहराध्यक्ष सचिन चिखले, उपाध्यक्ष राजू सावळे, शाखाध्यक्ष जय सकट, रोहित काळभोर आणि आकाश कांबळे सहभागी होणार आहेत.

मनसेच्या वतीने म्हटले गेले आहे की, सार्वजनिक सुरक्षितता धोक्यात येत असताना प्रशासनाचे दुर्लक्ष हे अत्यंत गंभीर आहे आणि जर लवकरात लवकर खड्ड्यांची डागडुजी आणि अडथळ्यांचे निराकरण झाले नाही, तर तीव्र आंदोलन करण्यात येईल.