ताज्या घडामोडीधार्मिक
पिंपरी चिंचवड साहित्य मंच आयोजित श्रावण शु. प्रतिपदा (२५ जुलै २०२५ ) पासून उपक्रम……. “लिहिते व्हा…” मालिकेचे नाव : चरित्रात्मक अभंग – लेखिका – माधुरी शिवाजी विधाटे
पिंपरी चिंचवड साहित्य मंच आयोजित
श्रावण शु. प्रतिपदा (२५ जुलै २०२५ ) पासून उपक्रम…….
“लिहिते व्हा…”
मालिकेचे नाव : चरित्रात्मक अभंग
भाग क्रमांक :- १४,
बुधवार, १९ नोव्हेंबर २०२५
प्रस्तुतकर्ता : सौ.माधुरी शिवाजी विधाटे
*श्री संत निळोबाराय*
पिंपळनेरला | निळोबा जन्मले |
संस्कार घडले | भक्तीमार्गी ||
भागवत धर्म | जेणे आचरिला |
नित्यचि स्मरला | पांडुरंग ||
विरक्त वृत्तीने | प्रपंच तो केला |
कर्माने साधला | परमार्थ
सद्गुरु प्राप्तीची | ओढ ही अंतरी |
राम कृष्ण हरी | जप सदा ||
थांबलीसे वीणा | मूक झाली वाणी |
नामाची स्मरणी | ओढतसे ||
ऐकुनिया धावा | विठू प्रकटला |
तरी आठवला | तुकाराम ||
संत तुकाराम | लाभो मज गुरू |
हाचि द्यावा वरू | पांडुरंगा ||
स्वप्नी आले गुरू | संत तुकाराम |
जैसा आत्माराम | देखियला ||
परमानंदाचा | गवसला ठेवा |
अनुग्रह मेवा | चाखविला ||
ऐशा साक्षात्कारे | धन्यचि जाहले |
भक्तीत रंगले | अंतर्बाह्य ||
जनमानसात | प्रसार भक्तीचा |
नामस्मरणाचा | मार्ग धरा ||
अभंगांमधून | पंढरी महात्म्य |
विठ्ठल महात्म्य | सांगितले ||
मंगलाचरण | कृष्ण विरहिणी |
मधुर गौळणी | वर्णियेले ||
अभंगगाथेत | बाळक्रीडेतून |
हरीचे दर्शन | घडविले ||
भागवत धर्म | ध्वजा उंचावूनी |
नामसंकीर्तनी | दंग झाले ||
भगवत् भक्त | थोर ऐसे झाले |
समाधी पावले | विठू पदी ||
सौ.माधुरी शिवाजी विधाटे
