पिंपरी चिंचवड साहित्य मंच आयोजित – लिहिते व्हा…” मालिकेचे नाव – चरित्रात्मक अभंग – माधुरी शिवाजी विधाटे

पिंपरी चिंचवड साहित्य मंच*आयोजित
श्रावण शु. प्रतिपदा (२५ जुलै २०२५ ) पासून उपक्रम…….
*”लिहिते व्हा…”*….
मालिकेचे नाव : चरित्रात्मक अभंग
भाग क्रमांक :- ११,
बुधवार, २९ ऑक्टोबर २०२५
प्रस्तुतकर्ता : सौ.माधुरी शिवाजी विधाटे

*श्री संत तुकाराम*
मुखी एक नाम | असे पांडुरंग |
अभंगाचा रंग | तुकाराम ||

निसर्गाची कुशी | भंडारा डोंगर|
हेच जणू घर | भक्तिभाव ||

वृक्षवल्ली हीच | भासती सोयरी |
असूनी संसारी | निर्विकार ||

विठ्ल विठ्ल | नामसंकीर्तन |
जाहले तल्लीन | तरुवर ||

उमटता ध्वनी | टाळ चिपळ्यांचा |
थवा पाखरांचा | थांबलासे ||

विसरले भान | इंद्रायणी जळ |
गाथेचे ते बळ | तारियेले ||

आकाशीचा सूर्य | जाहला शीतळ |
वाहे परिमळ | अभंगांचा ||

रुणझुण नाद | वाहतो हा वारा |
वीणेच्या या तारा | छेडतांना ||

रंगे विठूनामी | चराचर सृष्टी |
करतसे वृष्टी | आनंदाची ||

मुखी पांडुरंग | नामघोष चाले |
नेत्र मिटलेले | शांतभावे ||

ऐकुनिया धावा | येतो पांडुरंग |
नाचतो श्रीरंग | भक्तासाठी ||

तुका आणि विठू | नाही वेगळाले |
आत्म्याचेही झाले | एकरूप ||
® सौ. माधुरी शिवाजी विधाटे,पुणे
फोन -७५८८३२८४६९