मुंबई, (महाराष्ट्र ब्रेकिंग न्यूज) – राष्ट्रवादीच्या बालेकिल्ला असलेल्या पुण्यातच अजित पवार यांना मोठा धक्का बसला आहे. अजितदादांच्या समर्थक नेत्याने शिवसेनेच्या ठाकरे गटात प्रवेश केला आहे. अजित पवार यांचे खंदे समर्थक संजोग वाघेरे यांनी ठाकरे गटात प्रवेश केला आहे.
मुंबईतील ‘मातोश्री’ या ठाकरे यांच्या निवासस्थानी वाघेरे यांनी शिवसेना ठाकरे गटात प्रवेश केला. संजोग वाघेरे यांनी उद्धव ठाकरे यांच्या हस्ते शिवबंधन हाती बांधून घेतलं. हजारो समर्थांसह वाघेरे यांनी ठाकरे गटात प्रवेश केला. यावेळी शिवसेना ठाकरे गटाचे पक्षप्रमुख उद्धव ठाकरे, खासदार संजय राऊत यांच्यासह इतरही नेते उपस्थित आहेत. उद्धव ठाकरे यांनी संजोग वाघेरे आणि त्यांच्या समर्थकांचं पक्षात स्वागत केलं.
यावेळी उद्धव ठाकरे म्हणाले की, जे भावूक आहे,ज्यांच्यात संवेदना आहेत ते सर्व निष्ठेने भगव्यासोबत आहेत. आणि जे घाऊक आहेत ते कोण आहेत ते तुम्हाला सांगण्याची गरज नाहीये, तुम्हाला ते माहिती आहेत.’ असं म्हणत उद्धव ठाकरे यांनी वाघेरे यांचं स्वागत करत असतानाच शिंदे गटाला टोला लगावला आहे.
मी शब्द दिला होता, म्हणून जे आत्ता गद्दार झाले आहेत त्यांना उमेदवारी दिली होती. मात्र त्यांनी सत्ता हिसकावून घेतली. आमच्याकडे सत्ता नसताना देखील इकडे तुम्ही जिद्दीने सोबत आलात. तिथल्या कार्यकर्त्यांनी शब्द दिला आहे की, तुम्ही द्याल तो उमेदवार… आम्हाला इंडिया आघाडीला विचारतात तुमच्याकडे चेहरा कोण आहे. आमच्या कडे अनेक चेहरे आहेत, तुमच्याकडे कोण आहे? जे आहेत त्यांना आपण पाहतोय 10 वर्ष त्यांनी काय केलं आहे, असे उद्धव ठाकरे म्हणाले.
कोण आहेत संजोग वाघेरे
अजित पवार यांचे कट्टर समर्थक अशी संजोग वाघेरे यांची ओळख आहे. ते पिंपरी चिंचवडचे माजी महापौर आहेत. तसेच त्यांनी राष्ट्रवादीचे शहराध्यक्ष म्हणून काम पाहिलं आहे. वाघेरे यांनी मावळ लोकसभा मतदारसंघासाठी दोन वेळेस तयारी केली होती, मात्र त्यांना तिकीट मिळालं नाही. आता त्यांनी शिवसेना ठाकरे गटात प्रवेश केला आहे. उद्धव ठाकरे त्यांच्याकडे आता कोणती जबाबदारी सोपवणार हे पाहणं महत्त्वाचं ठरणार आहे.
