पिंपरी, (महाराष्ट्र ब्रेकिंग न्यूज) – माजी विद्यार्थ्यांचा स्नेह मेळावा पिंपरी वाघेरे येथील रयत शिक्षण संस्थेच्या नवमहाराष्ट्र विद्यालय व ज्युनिअर कॉलेजच्या १९८७ – १९८९ विज्ञान शाखेच्या माजी विद्यार्थ्यांचा स्नेह मेळावा नुकताच तत्कालीन गुरुजनां समवेत उत्साहात साजरा करण्यात आला. ३४ वर्षांनी एकत्र आलेल्या शिक्षक व माजी विद्यार्थी मधील भेटीने संपूर्ण वातावरण आनंदमय झाले होते.
कार्यक्रमाची सुरुवात सरस्वती पूजन व दीप प्रज्वलन करून मेळाव्यास सुरुवात करण्यात आली. त्यावेळच्या उज्वला गंभीर, सिद्धेश्वर चौधरी, शिवाजी मराठे, विष्णू सूर्यवंशी, सावंत एस पी, शेखर, अनिल कुंभार, विवेक कुंभार, शंकर टेमकर आदी शिक्षक व शिक्षकेतर कर्मचारी व २५ विद्यार्थी या मेळाव्यात सहभागी झाले होते. डॉक्टर महेश चौधरी हा माजी विद्यार्थी युनायटेड किंगडम वरून खास स्नेह मेळाव्यासाठी उपस्थित झाला होता. या स्नेह मेळाव्याच्या अध्यक्षस्थानी सहाय्यक पोलीस आयुक्त श्री गणेश शिंदे उपस्थित होते. माजी विद्यार्थ्यांनी आपली ओळख करून देऊन मनोगत व्यक्त केले व जुन्या शालेय आठवणींना उजाळा दिला. शिक्षकांनी सुद्धा आपले मनोगत व्यक्त करून मेळाव्या प्रती कृतज्ञता व्यक्त केली. उपस्थित सर्व शिक्षकांचा सत्कार करण्यात आला व त्यांना आठवण म्हणून भेटवस्तू, शाल, श्रीफळ, पुष्पगुच्छ वाटप करण्यात आले.
एकत्रित स्नेह भोजनाने मेळाव्याची सांगता करण्यात आली. संदीप हंसे यांनी प्रास्ताविक केले, नितीन कुंभार यांनी सूत्रसंचालन केले.
डॉक्टर महेश चौधरी यांनी आभार मानले. डॉक्टर राकेश प्रसाद, शिवाजी रेड्डी, नितीन चिंचवडे, राजू कापसे आदींनी मेळाव्याचे संयोजन केले.
