पिंपरी, (महाराष्ट्र ब्रेकिंग न्यूज) – पिंपरी-चिंचवड महानगरपालिकेमध्ये राष्ट्रवादी काँग्रेस पार्टीच्या गटनेतेपदी भाऊसाहेब भोईर यांची नियुक्ती करण्यात आली आहे. पक्षाच्या संघटनात्मक धोरणानुसार आणि महापालिकेतील भूमिका अधिक सक्षम करण्याच्या उद्देशाने हा निर्णय घेण्यात आला आहे.
महापालिकेतील राष्ट्रवादी काँग्रेसच्या नगरसेवकांचे नेतृत्व करणे, सभागृहात पक्षाची भूमिका ठामपणे मांडणे, तसेच शहरातील नागरिकांच्या विविध प्रश्नांवर प्रभावीपणे आवाज उठवणे ही जबाबदारी भाऊसाहेब भोईर यांच्यावर सोपविण्यात आली आहे. पाणीपुरवठा, रस्ते, स्वच्छता, आरोग्य, शिक्षण आणि नागरी सुविधांशी संबंधित प्रश्नांवर राष्ट्रवादी काँग्रेसची भूमिका अधिक आक्रमक राहणार असल्याचे संकेत देण्यात आले आहेत.
भाऊसाहेब भोईर हे पक्षाचे अनुभवी व अभ्यासू नेते म्हणून ओळखले जात असून, त्यांच्या नेतृत्वाखाली महापालिकेतील राष्ट्रवादी काँग्रेसचा गट अधिक संघटित व सक्रिय होईल, असा विश्वास पक्ष नेतृत्वाने व्यक्त केला आहे.
या नियुक्तीमुळे पिंपरी-चिंचवड महापालिकेतील राजकीय हालचालींना वेग येणार असून, सत्ताधाऱ्यांच्या निर्णयांवर प्रभावी नियंत्रण ठेवण्यासाठी विरोधी पक्षाची भूमिका अधिक ठोस होईल, असे राजकीय वर्तुळात बोलले जात आहे.
