निर्धार मेळाव्यात जनतेच्या न्यायालयात दाद मागणार – भाऊसाहेब भोईर
भोईर यांचा लढण्याचा निर्धार, पत्रकार परिषदेतून केली भूमिका जाहीर
२ ऑक्टोबर रोजी निर्धार मेळाव्यात करणार राजकीय भूमिका स्पष्ट
पिंपरी, (महाराष्ट्र ब्रेकिंग न्यूज )- संपूर्ण ताकदीनिशी मी चिंचवड विधानसभेच्या रणांगणात उतरणार असून या निवडणुकीत माझा पक्ष हा माझा मतदारच ठरवतील. जनतेच्या दरबारातच मी न्याय मागणार असून माझ्यासाठी सर्वच राजकीय पक्षाचे दरवाजे उघडे आहेत, अशी राजकीय भूमिका भाऊसाहेब भोईर यांनी पत्रकार परिषदेत व्यक्त केली.
आगामी विधानसभा निवडणुकीच्या पार्श्वभूमीवर आपली भूमिका मांडण्यासाठी आयोजित करण्यात आलेल्या पत्रकार परिषदेत भाऊसाहेब भोईर बोलत होते.कित्येक वेळा राजकारणात ज्यांच्यावर विश्वास ठेवला त्यांनीच जवळ बसून माझा कार्यक्रम केला, अशा शब्दांत राष्ट्रवादी काँग्रेस अजित पवार गटाचे माजी नगरसेवक आणि ज्येष्ठ नेते भाऊसाहेब भोईर यांनी आपली खंत व्यक्त केली
यावेळी पत्रकारांशी संवाद साधताना भोईर म्हणाले की, राजकारणात काम करत असताना हक्क असतानाही माझ्यावर वारंवार अन्याय करण्यात आला. कित्येक वर्षे चिंचवड विधानसभेत भावी आमदार म्हणून माझ्याकडे पाहण्यात आले. परंतु राजकीय अनैतिक खाचखळगे न जमल्याने आणि विरोधकांच्या आर्थिक गणितांपुढे कमी पडल्याने माझा पराभव झाला. २ ऑक्टोबर रोजी रहाटणी येथील थोपटे लॉन्समध्ये होणाऱ्या महानिर्धार मेळाव्यात मी माझी पुढची राजकीय भूमिका जनतेच्या साक्षीनेच स्पष्ट करेन, असेही भोईर यावेळी म्हणाले.
